नेकपा माओवादी केन्द्रका सांसद एवं पूर्वसंस्कृति, पर्यटन तथा नागरिक उड्डयनमन्त्री सुदन किराँतीको गीत ‘पलपल बगिरहेछु’ सार्वजनिक भएको छ । पार्टी अध्यक्ष एवं प्रधानमन्त्री पुष्पकमल दाहाल प्रचण्डले मन्त्रीबाट हटाएपछि उनले गीत सार्वजनिक गरेका हुन् । 

शनिबार काठमाडौंमा एक कार्यक्रमबीच पूर्वसंस्कृति, पर्यटन तथा नागरिक उड्डयनमन्त्री किराँतीको गीत ‘पलपल बगिरहेछु’ सार्वजनिक भएको हो । गीतको म्युजिक कम्पोजर शान्तिराम राई हुन् भने लेखक सुदन किराँती र गायक, कनकाइस्ट राई छन् । कार्यक्रममा बोल्दै सांसद किराँतीले आफ्नो जन्म महिनाको अवसर पारेर गीत विमोचन गरेको बताए । 

जन्मदिनमा केही नयाँ गरौँ भनेर गीत विमोचन गरेको उनले बताए । यही महिनामा बुद्ध र लुम्बिनीसम्बन्धी गीति भिडियो पनि सार्वजनिक गर्ने उनले बताए । ‘मेरो जन्मदिन फागुन १८ गते, त्यही दिन नै सार्वजनिक गर्ने इच्छा थियो तर पूर्वनिर्धारित कार्यक्रममा जानुपर्ने भएकाले भ्याइनँ,’ उनले भने, ‘आज हामीले जन्म आफैँमा मान्छेको ठूलो सिर्जना हो र यसलाई नै फरक तरिकाले मनाउँ भनेर हो ।’

सांसद किराँतीले कार्यक्रममा संस्कृतिविद् भैरवबहादुर थापालाई सम्मान गरेको पनि जानकारी गराए ।