रोमानियामा ५० प्रतिशत छायांकन सकिएपछि रोकिएको फिल्म ‘वर एण्ड बधु’को बाँकी काम अघि बढ्ने भएको छ । फिल्मका निर्देशक मिलन चाम्सका अनुसार बाँकी ५० प्रतिशत छायांकनको काम नेपालमा पूरा गरिनेछ ।

रोमान्टिक कमेडी कथामा तयार भइरहेको फिल्मको बाँकी काम चैतको तेस्रो साताबाट सुरु हुनेछ । फिल्ममा नवनायक विवेक कर्माचार्यले ‘वर’ र अभिनेत्री आँचल शर्माले ‘बधु’को भूमिका निभाउँदै छिन् ।

अभिनेता विवेकले दोस्रो सेड्यूलका लागि आफ्नो शरीर सुगठित बनाएका छन् । निर्देशक चाम्सले कथाको माग अनुसार नै विवेकले शरीर बनाएको बताए । उनले फिल्मले विवाहको सांस्कृतिक कथालाई देखाउने बताए ।

डाक्टर अमित रिजाल कार्यकारी निर्माता रहेको फिल्म एलआरके इन्टरटेन्मेन्टको ब्यानरमा निर्माण भएको हो । फिल्ममा सुदीप बरालको छायांकन छ ।