चितवन– बिरामीको चापसँगै यहाँको सरकारी अस्पताल भरतपुर अस्पतालले प्रयोगात्मक कक्षाका लागि आउने विद्यार्थीबाट गत आर्थिक वर्षमा दुई करोड ५५ लाख ४० हजार आम्दानी गरेको छ । अस्पतालमा जिल्लाका स्वास्थ्य विषय पढाउने प्राविधिक कलेज, मेडिकल कलेज र देशका विभिन्न भागबाट स्वास्थ्य विषय पढाउने प्राविधिक कलेजका विद्यार्थी प्रयोगात्मक कक्षाका लागि यहाँ आउने गर्दछन् । 

अस्पतालका मेडिकल सुपरिटेन्डेन्ट डा. कृष्ण पौडेलका अनुसार यहाँका दुई निजी कलेजले सरकारी अस्पतालमा प्रयोगात्मक कक्षा गर्ने गरी नर्सिङ विषय पढाउने गरिएको छ । नर्सिङमा प्रवीणता प्रमाणपत्र तह सञ्चालन गरेको आइओएमटीले गत वर्ष एकमुष्ट १९ लाख ९५ हजार र स्नातक तह सञ्चालन गरेको मेडिकल एन्ड टेक्निकल कलेजले ५४ लाख ४५ हजार बुझाएका हुन् । यस वर्ष उनीहरूले पाँच प्रतिशत थप रकम बुझाउने भएका छन् । 

अस्पतालका अनुसार अनमीका विद्यार्थीले दुई हजार ५००, प्रवीणता प्रमाणपत्र तहले चार हजार ५००, स्नातक तहका विद्यार्थीले ६ हजार र स्नातकोत्तरका विद्यार्थीले सात हजार मासिक रूपमा तिर्छन् । अघिल्लो आर्थिक वर्ष प्रयोगात्मक कक्षाका लागि एक करोड ८१ लाख दुई नर्सिङ कलेजले एकमुष्ट रकम बुझाएका थिए । मेडिकल सुपरिटेन्डेन्ट पौडेलका अनुसार दैनिक एक हजार ५०० हाराहारीमा बिरामी उपचारका लागि अस्पताल आउने गर्दछन् । अस्पतालमा ६०० शय्या भएकामा ८५ प्रतिशत बिरामी भरिने गर्दछ । 

काठमाडौँको प्रसूति गृह पछि सबैभन्दा बढी बच्चा भरतपुर अस्पतालमा जन्मिने गरेका छन् । उक्त अस्पतालका प्रसूति रोग विशेषज्ञ डा. श्री अधिकारीका अनुसार वार्षिक १५ हजार आमाले बच्चा यही अस्पतालमा जन्माउँछन् । उनले प्रसूति विभागमा बिरामीको चाप बढी हुने भएकाले देशका विभिन्न ठाउँका स्वास्थ्य शिक्षा पढ्ने विद्यार्थीको प्रयोगात्मक कक्षाका लागि भरतपुर अस्पताल उपयुक्त मानिएको बताइन् । प्रयोगात्मक कक्षाबाट आम्दानी राम्रो हुँदा अस्पताल सञ्चालनमा टेवा पुगेको छ ।