बालगायिका कमला घिमिरेले सामाजिक सन्जालमा लामो स्टाटस लेख्दै माफी मागेकी छिन् । उनले आफूले गाएको गीतका कारण विवादमा परेकाले माफी मागेकी हुन् । 

अन्जानमा गल्ती भएको भन्दै कमलाले माफी मागेकी मात्र छैनन्, आफूले गाएको दोहोरीलाई लिएर गरिएको हल्लाका कारण आफू छक्क परेको पनि बताएकी छिन् ।

उनले आफूले गाएको गीतलाई लिएर अनेक चर्चा गरिएको भन्दै त्यसलाई बुझिएको तरिका गलत भएको पनि बताएकी छिन् । आफूहरुले डलरका लागि भनेर सोचेर, सम्झेर स्क्रिप्ट तयार पारेर र कसैलाई बर्बादै पार्नका लागि दोहोरी नगाएको पनि उनले बताएकी छिन् ।

उनले अहिले गरिएको हल्लाका कारण आफू अझ बढी दुखी भएको र छक्क परेको पनि आफ्नो स्टाटसमा उल्लेख गरेकी छिन् ।

उनले र गायक सुमन परियारले गाएको लाइभ दोहोरीले गायिका समीक्षा अधिकारीलाई चोट परेको भन्दै यस विषयमा अहिले व्यापक रुपमा सामाजिक सन्जालमा टिकाटिप्पणी भइरहेको छ । कतिपयले गीतको निकै चर्को आलोचना पनि गरेका छन् ।

उनले यो गीतका कारण अहिले समीक्षालाई पर्न गएको असर, दिदीको आत्मसम्मान र असरप्रति हृदयदेखि नै माफी मागेको उल्लेख गरेकी छिन् । अनि उनले आफूलाई सानी बहिनी सम्झिएर माफी गरिदिन अनुरोध गरेकी छिन् । साथसाथै उनले आइन्दा यस्तो गल्ती नहुने पनि उल्लेख गरेकी छिन् ।