नुवाकोटको तारुकामा हरेक वर्ष माघे संक्रान्तिका दिनजस्तै यस वर्ष पनि दर्जनौँ गोरु जुधाइने भएको छ । ‘माघे संक्रान्ति गोरु जुधाइ महोत्सव’ व्यवस्थापन समितिले २८ हल गोरु जुधाइने जानकारी गराएको छ । 

तारकेश्वर गाउँपालिका–३ तारुका, चन्दनीस्थित कटहरबोट पाटोमा हरेक वर्ष जस्तै यो वर्ष माघेसंक्रान्ति मेलाको अवसरमा जुधाउन २८ हल गोरु दर्ता भएको समितिका अध्यक्ष मदन श्रेष्ठले जानकारी दिए ।

उनका अनुसार समितिले किसानलाई यही पुस २३ गतेसम्म दर्ता गर्न जारी गरेको सूचनाअनुसार २८ हल गोरु जुधाउन दर्ता भएका छन् । अघिल्ला वर्षजस्तै यस वर्ष आगामी माघ १ गतेसहित माघ २ गतेसमेत गोरु जुधाउन लागिएको छ । 

गोरु जुधाइ प्रतिस्पर्धालाई व्यवस्थित, आकर्षक, रोचक र थप मनोरञ्जनात्मक गतिविधिसमेत संलग्न गराइने भएकाले यस वर्ष दुई दिन गोरु जुधाउन लागिएको हो ।

अघिल्ला वर्ष मेलाका रूपमा मनाइने गरिएको भए पनि यो वर्ष महोत्सवका रूपमा दुई दिन मनाउन लागिएको छ भने राष्ट्रिय तथा स्थानीय कलाकारमार्फत लोकदोहोरी लगायत अन्य मनोरञ्जनका गतिविधिसमेत समावेश गराउन लागिएको छ ।

दर्ता भएका गोरुहरुलाई एकले अर्कोसँग (वान भर्सेज वान) प्रतिस्पर्धा गराउन लागिएको छ । प्रतिस्पर्धामा विजेता हुने गोरु, धेरै समयसम्म जुध्ने गोरु, उत्कृष्ट प्रस्तुतिका साथ जुध्ने गोरुलगायत शीर्षकमा गोरुधनी किसानलाई नगदसहित सम्मान गरिने आयोजकले जनाएको छ ।