झापाको दमक नगरपालिका–६ मा रहेको बालाजी फर्निसिङमा आगलागी हुँदा लाखौँको क्षति भएको छ । विकास भट्टराईले सञ्चालन गर्दै आएको फर्निसिङमा शनिबार बेलुका आगलागी हुँदा सबै सामान जलेर नष्ट भएको हो । 

आगलागीको कारण खुल्न सकेको छैन । आगलागीबाट फर्निसिङका कुर्सी, टेबल, तन्नालगायतका घरायसी सामान जलेका छन् । उनका अनुसार दमक, उर्लाबारी, गौरादहको दमकल, प्रहरी तथा स्थानीयवासीको सहायताबाट आगो निभाइएको हो । 

आगलागीबाट भएको क्षतिको यकिन विवरण संकलन भइरहेको इलाका प्रहरी कार्यालय दमकका प्रहरी नायब उपरीक्षक दिलीप गिरीले बताए ।

यही १ माघमा दमक–६ कै नमुना बजारका छवटा पसलमा आगजनी हुँदा २ करोड रुपैयाँभन्दा बढीको क्षति भएको थियो ।