नेकपा माओवादी केन्द्रको स्थायी कमिटी बैठक आजका लागि बोलाइएको छ । बैठक आज दिउँसो पार्टी मुख्यालय पेरिसडाँडामा बस्न लागेको हो ।

बैठकमा राष्ट्रपति, गृहमन्त्रीका विषयमा पार्टी अध्यक्ष पुष्पकमल दाहाल प्रचण्डले स्थायी कमिटीका सदस्यहरूको धारणा बुझ्नेछन् । निर्वाचन आयोगले आगामी २५ फागुनमा राष्ट्रपतिको निर्वाचन घोषणा गरिसकेको छ । त्यस्तै, ३ चैतमा उपराष्ट्रपतिको निर्वाचन गर्ने तालिका छ ।

निर्वाचन मितिसमेत तय भइसकेको अवस्थामा माओवादीले राष्ट्रपतिबारे छलफल गर्न लागेको हो । प्रधानमन्त्री दाहालले राष्ट्रिय सहमतिबाट राष्ट्रपति चयनमा जोड दिँदै आएका छन् ।

सत्ता साझेदार ठूलो दल नेकपा एमालेले भने सरकार गठनकै बेला राष्ट्रपति आफूले पाउने सहमति भएको दाबी गर्दै आएको छ । तर प्रधानमन्त्री प्रचण्डले भने आफूलाई चुनौती नदिने व्यक्तिलाई राष्ट्रपति बनाउन चाहिरहेका छन् ।