अफगानिस्तानविरुद्धको टी–२० सिरिजको दोस्रो खेलमा घरेलु टोली यूएई ९ विकेटले विजयी भएको छ । अफगानिस्तनाविरुद्ध यूएईको यो अहिलेसम्मकै फराकिलो जित हो ।
गएराति सम्पन्न खेलमा अफगानिस्तानले दिएको १ सय ३८ रनको लक्ष्य यूएईले १८.२ ओभरमा एक विकेट गुमाएर पूरा गर्यो । उसका लागि मोहम्मद वसीमले आक्रामक पारी खेले । ५० बलको सामना गरेका उनले सात छक्का र आठ चौकाको मद्दतमा ९१ रन बनाए ।
त्यस्तै, वृत्य अरविन्द ३८ र कप्तान चुन्दगापोयल रिजवान ९ रनमा अविजित रहे । अफगानिस्तानका लागि करिम जनतले मात्र एक विकेट लिन सके ।
त्यसअघि आबुधाबीस्थित जायेद क्रिकेट स्टेडियममा टस जितेर ब्याटिङ रोजेको अफगानिस्तानले निर्धारित २० ओभरमा ६ विकेट गुमाएर १ सय ३७ रन बनायो ।
उसका लागि नजिबुल्लाह जद्रानले २९ बलमा ५ चौका र एक छक्कासहित सर्वाधिक ३९ रन बनाए । त्यस्तै, हजरतुल्लाह जजाईले २७, अफसर जजाईले १८, रहमानउल्लाह गुर्बाजले १५, कप्तान राशिद खानले अविजित १४ र अजमातुल्लाह उमरजाईले १२ रन जोडे । यूएईका लागि जवर फरीद, जाहूर खानले दुई/दुई, जुनैद सिद्दिकी र अकिब राजाले एक/एक विकेट लिए ।
यो जितसँगै तीन खेलको सिरिज १–१ को स्थितिमा आएको छ । पहिलो खेलमा अफगानिस्तानसँग यूएई ५ विकेटले पराजित भएको थियो । अफगानिस्तान र यूएईबीचको निर्णायक तथा तेस्रो खेल आज हुँदैछ ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।