थिम्पु– नेपाली विभागीय टोली त्रिभुवन आर्मी क्लब भुटानमा जारी जिग्मे दोर्जी बाङ्चुक स्मृति गोल्डकप फुटबल प्रतियोगिताको सेमिफाइनलबाट बाहिरिएको छ । 

आज भएको पहिलो सेमिफाइनलमा १० खेलाडीमा सीमित आर्मी भुटानको पारो फुटबल क्लबसँग १–० गोलअन्तरले पराजित भयो । 

पारोको जितमा दिवस सुब्बाले निर्णायक गोल गरे । उनले खेलको ८६औँ मिनेटमा गोल गरे । 

आर्मी पहिलो हाफको ३२औँ मिनेटमै १० खेलाडीमा झरेको थियो । आर्मीका कप्तान भरत खवास दोहोरो पहेँलो कार्ड खाँदै मैदानबाट बाहिरिएका थिए । 

यसअघि, प्रतियोगितामा क्वार्टरफाइनलमा आर्मीले शुक्रबार भुटानको थिम्पु सिटीलाई ६–० को भारी अन्तरले हराएको थियो । पारोले उपाधिका लागि नेपाली क्लब थ्रीस्टार र भारतको युनाइटेड ब्रदर्शबीचको विजेतासँग खेल्नेछ ।