जनता समाजवादी पार्टी नेपालले कोशी प्रदेशमा भएको आन्दोलनका क्रममा निधन भएका पदम लिम्बूलाई सहिद घोषणा गर्न माग गरेको छ ।

जसपाका प्रवक्ता मनीष सुमनले आज एक विज्ञप्ति जारी गरी साे माग गरेका हुन् । विज्ञप्तिमा पहिचान प्राप्तिको आन्दोलनमा होमिएका पदम लिम्बुको निधनप्रति दुःख व्यक्त गर्दै जसपाले लिम्बूलाई सहिद घोषणा गरी उनको परिवारलाई उचित क्षतिपूर्ति उपलब्ध गराउन र आन्दोलनमा घाइते भएकाहरूको उचित स्वास्थ्य उपचारको व्यवस्था मिलाउन माग गरेको छ ।'

करिब एक महिनादेखि कोशी प्रदेशमा जारी रहेको पहिचान र अधिकारको आन्दोलनलाई सरकारले गम्भीरतापूर्वक नलिएकोमा जसपाले गुनासो गरेको छ । पहिचानको आधारमा प्रदेशको नामकरण गर्नुपर्छ भन्ने जनताको मागप्रति यसअघिका झैँ वर्तमान सरकार पनि असहिष्णु देखिएको टिप्पणी पनि गरेको छ ।

पहिचान र अधिकारको आन्दोलनलाई दमन गर्न सरकार उद्यत देखिएको दाबी गर्दै जसपाले पहिचानको आन्दोलन कुनै समुदाय वा जातिको विरुद्धमा नरहेको स्पष्ट पारेको छ ।