डा. सिके राउत नेतृत्वको जनमत पार्टी तत्काल मधेस प्रदेशका मुख्यमन्त्री सरोजकुमार यादव नेतृत्वको सरकारबाट नबाहिरिने भएकाे छ । 

गत ११ माघमा केन्द्र सरकारमा खानेपानी तथा सरसफाइ मन्त्रालयको जिम्मेवारी पाएका सो पार्टीका नेता अब्दुल खानले आज प्रधानमन्त्री पुष्पकमल दाहाल प्रचण्डसमक्ष राजीनामा बुझाए पनि मधेश सरकारबाट भने जनमत नबाहिरिने भएको हो ।  

जनमतका मधेस प्रदेशका संसदीय दलका नेतासमेत रहेका शिक्षा, विज्ञान, प्रविधि तथा वाणिज्य मन्त्री महेशप्रसाद यादवले प्रदेश सरकारबाट जनमत पार्टी अहिले नबाहिरिने जानकारी दिए । उनले भने, ‘प्रदेशमा भने अहिले हाम्रो पार्टीको समर्थन कायमै रहने छ । केन्द्रको निर्देशनअनुसार हामी अगाडि बढ्ने छौँ ।’ 

१०७ जना प्रदेशसभा सदस्य रहेको मधेस प्रदेशमा जनमत पार्टीका प्रत्यक्षमा ६ र समानुपातिकमा ७ गरी १३ जना सांसद छन् । मधेस सरकारमा हाल जनमतबाट दुई मन्त्री र एक राज्यमन्त्री सहभागी छन् । मधेश प्रदेश सभामा उपसभामुख पनि जनमतबाटै रहेका छन् । 

मधेस प्रदेशमा जनमतबाट समानुपातिक सांसद वसन्त कुशवाहा भूमि व्यवस्था, कृषि तथा सहकारी मन्त्री, सप्तरी २ (ख) बाट निर्वाचित महेशप्रसाद यादव शिक्षा, विज्ञान, प्रविधि तथा वाणिज्य मन्त्री र सिरहा २ (क) बाट निर्वाचित सञ्जयकुमार यादव राज्यमन्त्री छन् ।  

यता, जनमत पार्टीका अध्यक्ष राउतले आफ्नो पार्टी मन्त्री पदको भोको नरहेको बताएका छन् । प्रधानमन्त्री प्रचण्डले मन्त्रिपरिषद् विस्तार गरेलगत्तै राउतले ट्विट गर्दै यस्तो प्रतिक्रिया जनाएका हुन् ।

सरकारमा खानेपानी मन्त्रीको भूमिकामा रहेका अब्दुल खानले राजीनामा दिएपछि उनलाई बधाई दिँदै राउतले लेखेका छन्, ‘मा. अब्दुल खानलाई धेरै-धेरै बधाई छ– उहाँले राजीनामा दिएर साबित गर्नुभएको छ कि जनमत पार्टी कुनै मन्त्री पदको भोको होइन ।’

राउतले आफूहरू जनताको सेवक रहेको पनि जनाएका छन् । उनले लेखेका छन्, ‘जनतासँग गरेको बाचा अनुसार सेवा दिन सके पदमा बस्ने हो, कामै गर्न सकिएन र जनताको वाचा पूरा गर्न सकिएन भने टाँसिरहनुको औचित्य हुँदैन ।’