नेकपा एमालेका सचिव योगेश भट्टराईले राष्ट्रिय स्वतन्त्र पार्टी (रास्वपा) का सभापति रवि लामिछानेले जिते फेरि उपनिर्वाचन हुने दाबी गरेका छन् । आइतबार बिहान चितवनमा सञ्चारकर्मीसँग कुरा गर्दै उनले यस्तो बताएका हुन् ।

पूर्वमन्त्री समेत रहेका भट्टराईले सुशासन र भ्रष्टाचारको नारा बोकेर हिँड्ने लामिछानेको चरित्र उदाङ्ग भएको टिप्पणी पनि गरे । ‘उहाँको भर्जिनिटी समाप्त भइसक्यो । उहाँ अर्गानिक हुनुहुन्न । गृहमन्त्री भएर छोटो समयमा गरेको कामले नै प्रष्ट पारे,’ भट्टराईले भने, ‘मन्त्री छोड्नु अघिल्लो रात सार्वजनिक खरिद ऐनविरुद्ध ठेक्काको निर्णय भएको छ । हामी माथि सुशासनको कुरा उठाउने लामिछानेले गरेको कामले उनैको धज्जी उडायो ।’  

नागरिकताको विषयमा लामिछानेले गल्ती नभइ राज्यलाई ढाटेको पनि भट्टराईले बताए । ‘लामिछानेले गल्ती गरेको होइन ढाँटेको हो । समाजलाई ढाँट्नु अपराध हो,’ उनले भने, ‘यो पाँच वर्ष ढाँटेको कुरामा प्रायश्चित गरेर बस्न पर्थ्यो। तर उहाँ जनतामा उल्टै भ्रम छरेर बस्नु भएको छ ।’ 

चितवन–२ सहित बारा–२ र तनहुँ–१ मा यही १० वैशाखमा उपनिर्वाचन हुँदैछ ।