प्रतिनिधिसभा सदस्य उपनिर्वाचनअन्तर्गत तनहुँ–१ मा अहिलेसम्म ४० प्रतिशत मतगणना सकिएको छ । निर्वाचन आयोगका प्रवक्ता शालिग्राम शर्माका अनुसार अहिलेसम्म ४० प्रतिशत मतगणना सकिएको हो ।
भोलिसम्म गणना सक्नेगरी मतगणना भइरहेको उनले बताए । ‘४० प्रतिशत मतगणना सम्पन्न भएको छ । भोलिसम्म नतिजा आइसक्छ,’ शर्माले भने ।
जारी मतगणनामा राष्ट्रिय स्वतन्त्र पार्टी (रास्वपा) का उम्मेदवार स्वर्णिम वाग्लेले अग्रता कायमै राखेका छन् । उनले अहिलेसम्म १२ हजार ७०५ मत प्राप्त गरेका छन् ।
उनलाई पछ्याइरहेका नेपाली कांग्रेसका गोविन्द भट्टराईले ७ हजार ६४६ मत ल्याएका छन् । उनीभन्दा वाग्ले ५ हजार ५९ मतान्तरले अगाडि रहेका छन् ।
त्यस्तै, तेस्रो स्थानमा रहेका नेकपा एमालेका सर्वेन्द्र खनालले ४ हजार २१९ मत पाएका छन् । तनहुँ–१ मा आइतबार भएको उपनिर्वाचनमा ६३ हजार ७ सय ५७ मत खसेको छ ।
निर्वाचन कार्यालयका अनुसार कुल १ लाख २३ हजार ३ सय ५ जना मतदाता रहेको त्यहाँ उपनिर्वाचनमा करिब ५२ प्रतिशत मत खसेको छ । तनहुँ–१ मा विभिन्न ९ राजनीतिक दलका उम्मेदवार चुनावी मैदानमा छन् ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।