बिहीबार सेयर बजार सामान्य बढेको छ । वैशाखको १३ गतेदेखि लगातार घटिरहेको सेयर बजार परिसूचक नेप्से आज १२ दशमलव ७३ अंकले बढेकाे हाे । 

परिसूचक नेप्से बढेर एक हजार आठ सय ६९ दशमलव ७३ विन्दुमा पुगेको छ । आज सबै समूहको सेयर भाउ उकालो लागेको छ । 

कारोबार रकममा पनि सामान्य सुधार आएको छ । हिजो बुधबार ६२ करोड रुपैयाँको कारोबार भएकोमा आज दुई सय ७६ वटा कम्पनीका २५ लाख ३३ हजार कित्ता सेयर ७३ करोड २६ लाख रुपैयाँमा कारोबार भएका छन् ।

सबैभन्दा धेरै शिवम् सिमेन्टको दुई करोड २१ लाख रुपैयाँको सेयर किनबेच भयो । आज लक्ष्मी लघुवित्तको सेयर नौ प्रतिशतभन्दा धेरै तथा सयपत्री जलविद्युत् र आत्मनिर्भर लघुवित्त कम्पनीको सेयर आठ प्रतिशतभन्दा धेरैले बढेको छ । 

समग्रमा बजार बढेको दिन आज इस्टर्न हाइड्रोपावरकाे सेयर सबैभन्दा धेरै चार प्रतिशतले घटेकाे छ ।