संस्कृति, पर्यटन तथा नागरिक उड्डयनमन्त्री सुदन किरातीले आफूले घुस लिएको प्रमाणित गर्न चुनौती दिएका छन् ।

केही सञ्चारमाध्यम र सामाजिक सञ्जालमा मन्त्री किरातीले ‘पशुपति क्षेत्र विकासको कोषको जमिनको विषयमा भूमाफियासँग साँठगाँठ गरेको’ सामग्री प्रकाशित भएपछि उनले यस्तो चेतावनी दिएका हुन् ।   

मन्त्री किरातीले आफूले कसैसँग घुस लिएको प्रमाणित गरे एक मिनेट पनि पदमा नबस्ने उल्लेख गरेका छन् । उनले आफूले घुस नलिँदा र लिन नदिँदा आफ्नोबारे कुप्रचार भइरहेको पनि बताएका छन् । 

‘मैले घुस नखाँदा र नखुवाउँदा पापीहरू बौलाउन थाले, आखिरी म मर्दा ५ सयको कात्रो र ५ फिट जमिन चाहिएला ! प्रमाणित गर म एक मिनेट बस्दिनँ,’ मन्त्री किरातीले फेसबुकमा लेखेका छन् ।