साताको पहिलो कारोबार दिन आज नेपाल स्टक एक्सचेञ्ज (नेप्से) परिसूचकमा उच्च अंकको वृद्धि देखिएको छ । आज नेप्से परिसूचक ५३ दशमलव ०३ अंक अर्थात् दुई दशमलव ८४ प्रतिशतले बढेर एक हजार नौ सय १९ दशमलव ३७ अंकमा कायम भएको हो । 

आज दुई सय ७० कम्पनीको ४५ लाख ५७ हजार एक सय ६९ कित्ता सेयर ३१ हजार दुई सय ५२ पटक खरिद बिक्री हुँदा एक अर्ब ६५ करोड ६३ लाख ४० हजार ३९१ रुपैयाँ बराबरको कारोबार भएको छ ।
     
नेप्सेका सबै सूचक आज हरियो भएका छन् । सेन्सेटिभ इन्डेक्स नौ दशमलव ४९, फ्लोट इन्डेक्स तीन दशमलव ५९ र सेन्सेटिभ फ्लोट इन्डेक्स दुई दशमलव ९४ अंकले बढेको छ । सबै समूहका उपसूचक पनि बढेका छन् । सबैभन्दा धेरै निर्जीवन बीमा समूहको उपसूचक चार सय सात दशमलव ०८ र जीवन बीमा समूहको उपसूचक तीन सय ४२ दशमलव ०५ अंकले बढेको छ ।
     
बैंकिङ समूह १७ दशमलव ३५, विकास बैंक एक सय १७ दशमलव ४५, वित्त ५२ दशमलव ७४ र होटल तथा पर्यटन समूह दुई सय ७४ दशमलव ८४ अंकले बढेको छ । 

त्यसैगरी, जलविद्युत् ९१ दशमलव ३९, लगानी एक दशमलव ६२, उत्पादन तथा प्रशोधन एक सय ५७ दशमलव ८४, लघुवित्त ८८ दशमलव ९२, म्युचुअल फन्ड शून्य दशमलव १०, व्यापार ८२ दशमलव ०८ र अन्य समूह ४२ दशमलव ३७ अंकले बढेको छ ।
     
आइजीआई प्रुडेन्सियल इन्स्योरेन्स लिमेटेडको शेयर मूल्यमा सकारात्मक सर्किट लागेको छ । आज १६ वटा कम्पनीको मात्रै सेयर मूल्य घटेको छ । सबैभन्दा धेरै गुमाउनेमा ‘१२ प्रतिशत आइसीएफसी फाइनान्स लिमिटेड डिबेन्चर २०८३’ को सेयर मूल्य एक दशमलव ९६ प्रतिशतले घटेको छ ।
     
आज सबैभन्दा धेरै शिवम् सिमेन्ट लिमिटेडको  १५ करोड ८१ लाख ५४ हजार २३८ रुपैयाँ बराबरको तीन लाख ३० हजार पाँच सय ४३ कित्ता सेयर किनबेच भएको छ ।