गण्डकी प्रदेश सरकारले आइतबार आर्थिक वर्ष २०८०/८१ को नीति तथा कार्यक्रम प्रस्तुत गरेको छ । प्रदेश प्रमुख पृथ्वीमान गुरुङले प्रदेशसभाको सदनबाट सरकारको नीति तथा कार्यक्रम प्रस्तुत गरेका हुन् । 

नीति तथा कार्यक्रममा प्रदेशभित्र यातायात, खानेपानी, स्वास्थ्यसेवालगायत विषयलाई प्राथमिकतामा राखिएकाे छ । यातायात व्यवस्था कार्यालयका सेवा प्रवाहलाई प्रविधिमैत्री बनाउने, खानेपानीमा नागरिकको पहुँच सहज बनाउन लिफ्टिङ प्रणालीबाट उपलब्ध गराउने, सबै नागरिकलाई आधारभूत स्वास्थ्य सेवा विस्तार गरी सेवामा पहुँच र स्वामित्व बढाउने लगायत विषय समेटिएकाे हाे । 

नीति तथा कार्यक्रममा प्रदेश सरकारले मिर्गौला डायलाइसिसको प्रतीक्षमा रहेका बिरामीलाई निःशुल्क डायलाइसिस सेवा विस्तार गर्ने घोषणा गरेको छ । 

प्रदेश सरकारले चालू खर्च कटौती गर्ने र पुँजीगत खर्च बढाउने विषयलाई प्रथामिकता दिने जनाएको छ ।