प्रमुख प्रतिपक्षी नेकपा एमालेका सांसद योगेश भट्टराईले प्रधानमन्त्री पुष्पकमल दाहाल प्रचण्डले नागरिकता विधेयक प्रमाणीकरणमा आफूूसँग नभएको अधिकार प्रयोग गरेको आरोप लगाएका छन् । सोमबारको संसद् बैठकमा उनले प्रधानमन्त्री दाहाललाई आफूसँग नभएको अधिकार कसले दियो भन्दै प्रश्न पनि गरे ।   

‘प्रधानमन्त्रीलाई आफूसँग नभएको अधिकार कसले दियो ?  संसदको विशेष अधिकार हनन् गर्नेमाथि कारबाही हुनुपर्छ,’ भट्टराईले भने, ‘नेपाली जनतालाई दिउँसै ढाँट्ने ? राष्ट्रपति संसदभन्दा माथि हुँदै ।’  

उनले कालापानी, लिपुलेक र लिम्पियाधुरालगायत नेपालको भूमि अरूलाई दिने हक प्रधानमन्त्रीलाई नभएको पनि बताए । 

‘नेपाली भूमि अरूलाई दिने हक प्रधानमन्त्रीलाई दिइएको छैन । के आधारमा बंगलादेशको कुरा गर्नुभयो ? सट्टापट्टा गर्ने सर्तमा राष्ट्रियता बन्धक राख्न सक्दैनौँ । लम्पसारवाद आउँछ भने जुनसुकै लम्पसारविरुद्ध एमाले उभिन्छ,’ भट्टराईले भने ।