सरकारले असार १ गतेदेखि भदौ मसान्तसम्म सडक खन्न रोक लगाएको छ । सडक विभागले बिहीबार सार्वजनिक सूचना जारी गर्दै वर्षायाममा सडक खन्न प्रतिबन्ध लगाएको हो ।  

वर्षायाममा धारा, ढल, बिजुली, टेलिफोन आदि प्रयोजनका लागि सडक खन्दा तत्काल मर्मत सम्भार गरी यथास्थितिमा ल्याउन नसकिने र सडक थप बिग्रिँदै जाने भएकाले खन्न रोक लगाइएको विभागले जनाएको छ । 

रोक लगाइएको अवधिमा संघीय सडक सुपरिवेक्षण तथा अनुगमन कार्यालय काठमाडौं र सडक डिभिजन मातहतका कुनै पनि सडक खन्ने स्वीकृति नदिइने पनि विभागले जारी गरेको सूचनामा उल्लेख गरिएको छ ।  

यदि कसैले सूचनाको उल्लंघन गर्दै सडक खनेको पाइएमा सार्वजनिक सडक ऐन २०३१ अनुसार कडा कारबाही गरिने विभागले चेतावनी दिएको छ ।