काठमाडौं– आज प्रधानमन्त्री निवास बालुवाटारमा उपप्रधानमन्त्री तथा रक्षामन्त्री ईश्वर पोखरेलले प्रधानमन्त्री एवं राष्ट्रिय सुरक्षा परिषद्का अध्यक्ष केपी शर्मा ओलीलाई राष्ट्रिय सुरक्षा नीति, २०७५ का लागि तयार पारिएको प्रतिवेदन बुझाए ।
प्रतिवेदन बुझ्दै प्रधानमन्त्री ओलीले राष्ट्रिय सुरक्षाको सबैभन्दा बलियो किल्ला जनता नै भएको बताए ।
नेपालको द्वन्द्व व्यवस्थापन र शान्ति स्थापनामा नेपाली सेनाले निर्वाह गरेको भूमिकाको सराहना गर्दै उनले राष्ट्र एकीकरणका क्रममा निर्माण भएको नेपाली सेनाले अन्तर्राष्ट्रिय शान्ति स्थापनार्थ योगदान पुर्याउदै आएको कुरा प्रशंंसनीय रहेको बताए ।
सो क्रममा रक्षामन्त्री पोखरेलले नेपालको संविधानको मर्म र भावना तथा संविधानका निर्देशक सिद्धान्तलाई मुख्य आधार मानेर परिवर्तित सन्दर्भअनुरुप मस्यौदा तर्जुमा गरिएको बताए ।
राष्ट्रिय सुरक्षा परिषद्ले सुरक्षा नीति परिमार्जनको आवश्यकता महसुस गरी ५ असोजमा उपप्रधानमन्त्री तथा रक्षामन्त्री पोखरेलको अध्यक्षतामा ७ सदस्यीय ‘राष्ट्रिय सुरक्षा नीति, २०७३ उच्चस्तरीय परिमार्जन समिति’ गठन गरेको थियो । सोही समितिले राष्ट्रिय सुरक्षा नीति, २०७५ को प्रतिवेदन तयार गरी प्रधानमन्त्रीलाई बुझाएको हो ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।