वरिष्ठ चलचित्रकर्मी नीर शाहले चलचित्र क्षेत्रलाई मानव अधिकारको वकालत गर्ने प्रमुख संयन्त्रको रूपमा विकास गर्न सकिने बताएका छन् । मानव अधिकार प्रवर्द्धनमा चलचित्रको भूमिका विषयक अन्तरक्रिया कार्यक्रममा शाहले चलचित्र क्षेत्रलाई मानव अधिकारको वकालत गर्ने प्रमुख संयन्त्र बनाउन सक्ने हो भने मानव अधिकार र चलचित्रको इतिहासमा नयाँ सुरुवात हुने बताए । त्यसको लागि गम्भीर भएर काम गर्नुपर्ने उनको भनाइ थियो । 

उनले भने, ‘चलचित्र क्षेत्रलाई मानव अधिकारको वकालत गर्ने प्रमुख संयन्त्रको रूपमा विकास गर्नका लागि के गर्न सक्छौ भन्ने विषयमा ध्यान दिएर काम गर्ने हो भने मानव अधिकार र चलचित्रको इतिहासमा नयाँ सुरुवात हुन्छ ।’

चलचित्रकर्मी शाहले सिनेमाले मानव अधिकारको संरक्षणका लागि सोच्न र गर्न सक्ने कामहरूलाई आफ्नो प्राथमिकतामा राख्ने प्रयास गरेको भन्दै यसलाई अझ परिष्कृत गर्दै जानुपर्ने बताए ।

उनले भने, ‘सिनेमाले मानव अधिकारको संरक्षणका लागि सोच्न र गर्न सक्ने कामहरूलाई आफ्नो प्राथमिकतामा राख्नै पर्छ । त्यस्तो प्रयासहरू पनि भएको छ, तर त्यसले समाजमा परिवर्तन भएको छ छैन त्यो अर्को कुरा हो । हामीले विभेद, कुसंस्कार, महिलाको हक, सबै विषयलाई समेटेर मानव अधिकारलाई बुझाउने जति पनि चलचित्र बनाएका छौ त्यो जानेर होइन अर्को कथाको विषयमा बनाउँदा आफै त्यो पाटो झल्किएको हो ।’