विराटनगर– साफ महिला च्याम्पियनसिप फुटबल प्रतियोगिताको पहिलो खेलमा नेपालसँग ३–० ले पराजित भएपछि भुटानका प्रशिक्षक सुङ जियालीले प्रतियोगिताको व्यवस्थापनमाथि प्रश्न उठाएका छन् ।

हारपछि प्रतिक्रिया दिँदै उनले भने, ‘हामी बस्ने होटल राम्रो भएन । होटल खोज्दै दिन गयो ।’ 

भुटाननी टोली काठमाडौंबाट आइतबार बिहान प्रतियोगिता हुने सहर विराटनगर पुगेको थियो । भुटानी टोलीका लागि आयोजक एन्फाले स्ट्रन स्टार होटल बुक गरेको थियो ।

पहिलो दिन त्यहीँ बसेको भुटानी टोली होटल नराम्रो भएको भन्दै भोलिपल्ट नयाँ होटल खोज्न हिँड्यो । र, साँझतिर स्ट्रनबाट ह्यारिसन होटलमा सरेर बस्यो । बस्ने व्यवस्थाको राम्रो नभएको भन्दै भुटानी टिमले सोमबार अभ्यास गरेन ।

आजको खेलमा नेपालसँगको हारमा प्रशिक्षक सुङले व्यवस्थापनमा भोग्नुपरेको कठिनाइलाई दोष दिए । यति ठूलो अन्तर्राष्ट्रिय प्रतियोगिताको व्यवस्थापन लज्जास्पद भएको उनले टिप्पणी गरे ।

आफ्नो प्रशिक्षण करिअरमा यसअघि कहिल्यै यस्तो अवस्थाबाट गुज्रिनु नपरेको भन्दै उनले व्यवस्थापकीय असहजताका कारण प्रशिक्षणमा ध्यान दिन नसक्दा हार व्यहोर्नुपरेको दाबी गरे ।