बर्दिया कारागारमा कैद सजाय काटिरहेका एक कैदी आज बिहान कारागारबाट फरार भएका छन् ।
कर्तव्य ज्यान मुद्दामा जिल्ला अदालत बर्दियाबाट सजाय पाएर एक वर्षदेखि कैद भुक्तान गरिरहेका ठाकुरबाबा नगरपालिका–८ का २७ वर्षीय अजित बुढा क्षेत्री बर्दिया कारागारबाट भागेका हुन् ।
उनी आइतबार बिहान करिब ३ बजे कारागारको ट्रस्टमाथि रहेको पर्खालबाट हाम फालेर फरार भएको बर्दिया कारागारका प्रमुख सन्तोष विकले बताए । उनका अनुसार बुढा क्षेत्रीले गत एक वर्षदेखि बर्दिया कारागारमा कैद भुक्तान गरिरहेका थिए ।
अनुसन्धानको क्रममा बुढा क्षेत्री कट्टु मात्र लगाएको अवस्थामा भागेको जिल्ला प्रहरी कार्यालयले जनाएको छ ।
प्रहरी उपरीक्षक सुधीरराज शाहीले बुढा क्षेत्री फरार भएको थाहा पाउनासाथ नेपाल प्रहरी र सशस्त्र प्रहरीको टोली परिचालन गरेर खोजी कार्य भइरहेको जानकारी दिए ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
