भारतको मुम्बईमा विमान दुर्घटना भएको छ । भारी वर्षाका कारण मुम्बइस्थित विमानस्थलमा बिहीबार साँझ सानो विमान दुर्घटना भएको हो । 

दुर्घटनामा परी आठजना घाइते भएका छन् । स्थानीय सञ्चारमाध्यमका अनुसार विमान अवतरणका क्रममा धावनमार्गबाट चिप्लिएर दुई भागमा टुक्रिएको छ । 

सो निजी विमानमा चालक दलका तीन सदस्यसहित आठजना सवार थिए । दुर्घटनापछि विमानस्थलमा उडान आगमन र प्रस्थान केहीबेर रोकिएको थियो । 

विमानस्थलले विज्ञप्ति जारी गर्दै ‘विशाखपटनमबाट मुम्बईका लागि उडान भरेको भिटी–डिबिएल लियरजेट ४५ विमान स्थानीय समयअनुसार साँझ ६ः४७ बजे धावनमार्गमा चिप्लिएर दुर्घटनाग्रस्त भएको’ जनाएको छ ।