नेपालले एकेडेमी अफ मोसन पिक्चर आर्टस् एन्ड साइन्सेस (ओस्कार अवार्ड)को ९६औँ संस्करणमा प्रतिस्पर्धाका लागि चलचित्र ‘हल्कारा’लाई पठाउने भएको छ । चलचित्र ‘हल्कारा’ले अन्तर्राष्ट्रिय फिचर चलचित्र विधामा प्रतिनिधित्व गर्ने भएको हो ।
सोमबार बसेको छनोट समिति बैठकबाट ‘हल्कारा’लाई सिफारिस गर्ने निर्णय गरेको हो । समितिमा चलचित्र विकास बोर्डका सदस्य राजु केसी संयोजक छन् । त्यस्तै, मञ्जुकुमार श्रेष्ठ, गौतम धिमाल, सामीप्यराज तिमल्सिना सदस्य छन् भने रीतिका भट्टराई सदस्यसचिव छिन् ।
ओस्कार अवार्डका लागि पाँच चलचित्रको आवेदन परेको र तीमध्येबाट ‘हल्कारा’लाई सिफारिस गर्ने निर्णय भएको समितिका सदस्य सामीप्यराज तिमल्सिनाले जानकारी दिए । उनका अनुसार समितिमा चलचित्रहरू ‘डाकिनी’, ‘हल्कारा’, ‘नीरफूल’, ‘बुलाकी’ र ‘बगान’ चलचित्रहरुको आवेदन परेको थियो ।
सन् २०२४ मा अमेरिकाको लस एन्जल्समा ओस्कार अवार्ड हुँदै छ । सो अवार्ड समारोहमा नेपाली चलचित्रको प्रतिनिधित्व हल्काराले गर्ने पक्का भएको छ ।
यो चलचित्रको निर्देशन विक्रम सापकोटाले गरेका हुन् । चलचित्रमा महेश त्रिपाठी, विनिता थापामगर, उमेश तामाङ, पशुपति राई, दीपक क्षेत्री, विद्या कार्कीलगायत कलाकारले अभिनय गरेका छन् ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
