सोमबार कान्तिपथमा अज्ञात व्यक्तिहरुबाट कालोमोसो आक्रमणमा परेका व्यवसायी दुर्गा प्रसाईंले आफूमाथि एमाले अध्यक्ष केपी शर्मा ओलीले आक्रमण गराएको दाबी गरेका छन् ।
एमाले अध्यक्ष केपी शर्मा ओलीको निर्देशनमा युवा संघका कार्यकर्ताले आफूमाथि आक्रमण गरेको उनको दाबी छ । आफूले सबैलाई चिन्ने दाबी गर्दै उनले भने, ‘मसितै हिँडेका केटा त हुन् नि एमालेका । प्रहरीले उजुरी दिन भनेको थियो, तर मैले दिइनँ ।’
घटनापछि सोमबारै प्रसाईंले सामाजिक सञ्जालमा स्टाटस लेख्दै ओली र एमालेलाई ‘धन्यवाद’ दिएका छन् । उनले लेखेका छन्, ‘हजुरबा केपी ओली र कमरेड महेश बस्नेत लगायत सम्पूर्ण एमाले तथा राष्ट्रिय युवा संघलाई धन्यवाद छ । तपाईंहरुले दिनुभएको पैँचो नेपाली जनताले छिट्टै फिर्ता गर्नेछ ।’
प्रसाईंले ‘कुख्यात राष्ट्रघाती, अपराधी र तस्करहरुको फोटो सार्वजनिक गर्ने’ भन्दै आज कान्तिपथको होटल एल्लो प्यागोडामा पत्रकार सम्मेलन राखेका थिए । कार्यक्रममा उनले भ्रष्टाचारी र तस्कर भन्दै देशका केही व्यवसायीको तस्बिर सार्वजनिक गरेका थिए ।
कार्यक्रम सकेर गाडीभित्र चढिसकेका उनले सबैसँग विदाइ अभिवादन गरिरहेको बेला उनीमाथि प्लाष्टिकको लोला प्रहार भयो । लोलाभित्रको कालोमोसोले प्रसाईं शरीर निथ्रुक्कै भिजका थिए ।
सो घटनामा प्रहरीले अहिलेसम्म कसैलाई पनि पक्राउ गरेको छैन । प्रहरीले उजुरी गर्न आग्रह गर्दा उनले इन्कार गरेका थिए ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
