रौतहटका तीन पालिकामा धर्ना र तालाबन्दी, जनप्रतिनिधि र कर्मचारी नै आन्दोलित

रौतहटका तीन स्थानीय तहमा जनप्रतिनिधि तथा कर्मचारीले विभिन्न माग राख्दै आन्दोलन गरेपछि सेवाग्राही मारमा परेका छन् । गरुडा, कटहरिया तथा फतुवा विजयपुर नगरपालिकामा जनप्रतिनिधि तथा कर्मचारीले दैनिक सेवामा अवरोध गरेपछि सेवाग्राही मारमा परेका हुन् ।

कटहरिया नगरपालिकामा उपप्रमुख रितादेवी यादवको नेतृत्वमा गएको जनप्रतिनिधिको टोलीले कर्मचारीहरूको कार्यकक्षमा तालाबन्दी गरेका छन् । विभिन्न ८ बुँदाको माग राख्दै सोमबारदेखि वडा नम्बर १ का अध्यक्ष भूपेन्द्र कुशवाहा, वडा नम्बर ४ का अध्यक्ष चन्दन कुशवाहा, ७ का अध्यक्ष सहिद मियाँ, कार्यपालिका सदस्य जामुन ठाकुरलगायतको टोलीले तालाबन्दी गरेको हो । 

कर्मचारीहरूको छुटा–छुटै कोठामा तालाबन्दी गरेका कारण कार्यालयबाट सेवा प्रवाह हुन सकेको छैन । नगर क्षेत्र अन्तर्गत घरायसी प्रयोजनमा खर्च भएको विद्युत् महसुल बापत प्राधिकरणको बक्यौता रकम सुनिश्चित गर्नुपर्ने, नगरपालिका मातहत तथा कार्यालयमा विगतदेखि खटिँदै आएका कर्मचारी, डोर, करार, सपाइकर्मी सबैको बाँकी तलब भुक्तानी गर्नुपर्ने माग अघि सारेका छन् ।

त्यसै गरी कर्मचारी राख्ने नराख्नेबारे छलफल गर्नुपर्ने, कुनै पनि शीर्षकमा खर्च गर्नु अघि खर्चको प्रस्तावमाथि नगर कार्यपालिका बोर्ड बैठकबाट सुनिश्चित गर्नुपर्ने माग पनि अघि सारेका छन् ।
गएको पुस १८ गते बसेको कार्यपालिका बोर्डको बैठकमा उक्त विषयबारे जानकारी माग्दा अजय प्रकाश जैसवालले २३ गते हुने कार्यपालिका बोर्डको बैठकमा पेस गर्ने प्रतिबद्धता जनाएको भए पनि त्यसो नगरेपछि बाध्य भएर तालाबन्दी गरिएको नगर उपप्रमुख यादवको भनाई छ ।

गरुडा नगरपालिकामा पनि उपप्रमुख पुनम चौधरीको नेतृत्वमा कार्यालयमा तालाबन्दी तथा धर्नाको कार्यक्रम हुँदा सेवाग्राही मर्कामा परेका छन् । पुस २० गतेदेखि कार्यपालिकाको मुख्य गेटमा ६ बुँदे माग राखेर धर्नामा बसेपछि कार्यालयको काम प्रभावित भएको हो ।गरुडा नगर कार्यपालिकाको कार्यालयमा बुधबार छैठौं दिन धर्ना जारी छ । कार्यपालिकाको नियमित बैठक गर्न, नगर सभाका निर्णयहरू कार्यपालिका सदस्यहरू माझ सार्वजनिक गर्न लगायतका मागहरू राखेर जनप्रतिनिधि नै आन्दोलित भएका हुन् । 

लामो समयदेखि तलब सुविधा नपाएको भन्दै फतुवा विजयपुर नगरपालिकामा कार्यरत शिक्षक–कर्मचारी पनि धर्ना जारी राखेका छन् । पालिकाका कर्मचारी तथा जनप्रतिनिधिबिच आपसी विवादका कारण गत साउनदेखि तलब पाउन नसकेपछि शिक्षक–कर्मचारी धर्नामा बसेका हुन् । 



जनप्रतिनिधिबिच आपसी विवादका कारण फतुवा विजयपुरमा नगर सभा समेत हुन नसकेको हो । नगरपालिकाको कार्यवाहक मेयर अम्बेया खातुनले नगर सभा गर्नका लागि पटक पटक बैठक आह्वान गरे पनि विवादका कारण नभएको जनाए ।

फतुवा विजयपुरमा नेपाली कांग्रेसबाट विजयी मेयर, उपमेयर, ७ जना वडा अध्यक्ष र ८ जना मनोनीत गरी १७ जना र अन्य दलका चार जना वडा अध्यक्ष, प्रमुख प्रशासकीय अधिकृत गरी कुल २१ जना नगर कार्यपालिका बोर्डका सदस्य छन् । 

  • प्रकाशित मिति : पुस २५, २०८० बुधबार १२:५२:६

फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।


यस विषयसँग सम्बन्धित समाचार

यो सामग्री सेयर गर्नुहोस्

यो सामग्री सेयर गर्नुहोस्

यो पनि नछुटाउनुहोस्
मल्टिमिडिया