Mon, 23 Sep, 2019


पुरुषबाट बच्न स्तनको आइरनिंग
फरकधार / चैत १४, २०७५

ब्रेस्ट आइरनिंग अर्थात छातीलाई तातो प्रेसले दबाउनु । यस परम्पराअनुसार किशोरीहरुको छातीमा कुनै तातो वस्तुले दबाइन्छ ताकि उनीहरुको स्तन छिटै बाहिर नदेखियोस् र पुरुषहरुको नजर नपरोस् । 



यो चलन विशेषगरी पश्चिमी अफ्रिाकाबाट सुरु भएर अहिले बेलायतलगायत युरोपका केही देशसम्म फैलिएको छ । 

बेलायतको नेशनल एजुकेशन युनियनले ब्रेस्ट आइरनिंगको बारेमा विद्यालय शिक्षाको पाठ्यक्रममा समावेश गरेर जनचेतना बढाउँदै लैजानुपर्ने र बालिकाहरुलाई यसबाट बचाउनुपर्नेमा जोड दिँदै आएको छ । 

रुन दिएनन् 

किनाया (नाम परिवर्तन) बेलायतमा बस्छिन् । उनको परिवार पश्चिमी अफ्रिकाबाट आएका हुन् । ब्रेस्ट आइरनिंगको सुरुवात पनि यही क्षेत्रबाट भएको थियो । 

१० वर्षको उमेर उनले यस्तो चलन भोग्नुपर्यो । 

उनकी आमाले भनेकी थिइन् ‘यदि तिमीले यस्तो नगरे, पुरुषहरु तिमीसँग जबरजस्ती शारीरिक सम्बन्ध राख्न खोज्छन् ।’

धेरैजसो आमाहरुले नै आफ्ना छोरीको ब्रेस्ट आइरनिंग गर्छन् । 

यस प्रक्रियामा एउटा ढुंगा वा चम्चालाई आगोमा तताइन्छ, अनि बालिकाहरुको छातीमा बेस्सरी दबाइन्छ, जसबाट उनीहरुको छाती समतल होस् । 

यो प्रक्रिया लामो समयसम्म चल्छ । 

किनाया भन्छिन् ‘हामीलाई रुनसम्म पनि दिइँदैन्, यदि रोइयो भने परिवारलाई लज्जित गराएको भन्ने बुझिन्छ, तिमी बलियो छोरी होइन् ।’

किनाया ठूली भइसकेकी छन्, उनका दुई छोरी पनि छन् । किनायाकी आमाले उनका छोरीको ब्रेस्ट आइरनिंग गर्न सल्लाह दिन्छिन् । 

किनाया भन्छिन् ‘म मेरी छोरीलाई यस्तो दर्दनाक हालतमा पुर्याउन चाहन्न, मलाई त्यसको पीडा आजसम्म पनि महसुस हुन्छ ।’

उनी आफ्नो परिवारबाट अलग बस्छिन् । परिवारले उनको मन्जुरीबिना पनि छोरीहरुलाई त्यस्तै पीडा दिनेछन्, यही डरले उनी परिवार छोडर बसेकी छन् । 

एक अनुमानअनुसार बेलायतमा पनि करिब एक हजार बालिकाहरु यस्तै पीडाबाट गुज्रिरहेका छन् । 

‘ब्रेस्ट आइरनिंग सामान्य कुरा होइन्, शारीरिक शिक्षा पढ्ने क्रममा आइरनिंगबाट पीडित साथीहरुमा मानसिक समस्या देखिन्छ’ आफ्ना सहपाठीको पीडालाई नजिकबाट देखेकी एक छात्रा बताउँछिन् । 

ब्रेस्ट आइरनिंगको समस्या समाधान गर्न विद्यालय शिक्षादेखि नै यसबारेमा पढाइनुपर्ने नेशनल एजुकेशन युनियनकी सह–अध्यक्ष किरी टुंक्स बताउँछिन्, ‘यो महिलामाथि भइरहेको यौन शोषणको नयाँ तरिका हो, यसलाई शिक्षाको माध्यमबाट रोक्न आवश्यक छ ।’ 

भिक्टोरिया डर्बिसायर कार्यक्रममा ब्रेस्ट आइरनिंगकी पीडित सिमोन भन्छिन् ‘तेह्र वर्षको उमेरमा मेरो ब्रेस्ट आइरनिंग गरिएको थियो । केही महिनासम्म यो प्रक्रिया चलिरह्यो । पछिसम्म स्तन बाहिर नदेखियोस भनेर छातीमा कसिलो पट्टी बाँधिएको थियो । जब म आमा बने, त्यसपछि यसको असर मलाई थाहा भयो । मेरा बच्चालाई दुध पिलाउँदा स्तनभित्र केही गाँठा भएको महसुस गरे, मेरा स्तनका केही नसा बर्बाद भएको जस्तो मलाई लाग्यो ।’

लुकेको अपराध 

ब्रेस्ट आइरनिंग कानुनको भाषामा कुनै अपराध होइन् । बेलायती गृह मन्त्रालयले यसलाई बाल शोषणको श्रेणीमा राखेर हेर्छ र सामान्य कानुनको माध्यमबाट मुद्दा चलाउँछ । 

सुरक्षा लेक्चररको काम गर्ने पूर्व स्त्री रोग विशेषज्ञ एन्जी म्यारियट भन्छिन् ‘यसका केसहरु प्रहरीसमक्ष पुग्दैनन् यसकारण यो परम्पराको बारेमा स्पष्ट जानकारी छैन ।’ 

म्यारियटका अनुसार यो संवेदनशिल र लुकेको अपराध हो । महिलाहरु सामाजिक दबावका कारण बोल्न डराउँछन् । उनीहरु यो विषयमा बोल्दा समाजले बहिष्कार गर्न सक्ने डर महिलामा छ । 

सीमोनको शरीरमा अझै यो शोषणको निशान छ, उनी चाहन्छिन् अरु कुनै छोरीहरु यस्तो अवस्थाबाट गुज्रिन नपरोस् । उनी यस अपराधको बारेमा जनचेतना फैलाइरहेकी छन् । 

उनी भन्छिन् ‘यो एक किसिमको शोषण हो, यसमा पीडा हुन्छ, यसले तपाईलाई अमानवीय बनाउँछ, यस्तो लाग्छ तपाई मानिस नै होइन् ।’


यस विषयसँग सम्बन्धित समाचार

यो सामाग्री सेयर गर्नुहोस्


यो पनि नछुटाउनुहोस्