नेपाल वैदेशिक रोजगार व्यवसायी संघका अध्यक्ष राजेन्द्र भण्डारीले वैदेशिक रोजगारीमा जाने नागरिकका विषयमा उठाएका मुद्दाहरूमा सरकारी निकायहरूबीच तालमेल नहुँदा नतिजा आउन  नसकेको बताएका छन् । 

आइतबार श्रम मन्त्रालयमा १९ बुँदे ज्ञापनपत्र बुझाउँदै संघका अध्यक्ष भण्डारीले वैदेशिक रोजगार व्यवसायीहरूका लागि आवश्यक सेवा शुल्क निर्धारण गर्नुपर्ने बताए । 

उनले भने, ‘सरकारी निकायसँग आवश्यक समन्वय नभएका कारण नेपाल वैदेशिक रोजगार व्यवसायी संघले उठाएको मुद्दाहरूको प्रभावकारी नतिजा आउन सकेको छैन । व्यवसायी संघले लामो समयदेखि जरुरी मुद्दाहरू उठाइरहेको छ तर त्यसको नतिजा आउन सकिरहेको छैन । हाम्रो नीति एकातिर र काम अर्कैतिर भयो । पपुलिस्टिक भयो तर रियालिस्टिक भएन ।’ 

वैदेशिक रोजगार व्यवसायलाई व्यवस्थित बनाउन लिने गरिएको सेवा शुल्क चाँडै निर्धारण गर्नुपर्ने अध्यक्ष भण्डारीको भनाई छ । सरकारले निर्धारण गरेको सेवा शुल्कका विषयमा थप छलफल गर्नुपर्ने साथै कामदारलाई वैदेशिक रोजगारमा पठाउँदा सबै पक्षबीच घनीभूत छलफल गर्नुपर्ने उनको धारणा थियो । 

यस्तै ज्ञापन पत्र बुझ्दै श्रम मन्त्रालयका सचिव केवलप्रसाद भण्डारीले १९ बुँदे मागकाबारे मन्त्रालयको ध्यानाकर्षण भएको बताउँदै उक्त विषयमा छलफल अगाडि बढाउनुपर्ने बताए । 

उनले वैदेशिक रोजगार क्षेत्रमा क्रियाशील व्यवसायीहरूले लिने सेवा शुल्क र वैदेशिक रोजगारमा जाने श्रमिकको सुरक्षाको लागि नेपाल व्यवसायी संघले उठाएका मागप्रति मन्त्रालय सकारात्मक रहेको बताए । 

उनले भने, ‘आज वैदेशिक रोजगारको संवेदनशीलता, कामदारहरूको सुरक्षा, हक, अधिकार, सामाजिक सुरक्षामा मन्त्रालय गम्भीर छ । वैदेशिक रोजगारमा अहिले भइरहेको बेथिति हटाउनका लागि संघले चालेको भूमिका सराहनीय छ ।’