logo-img

लगानी सम्मेलनका लागि होटल संघ नेपालका अध्यक्ष साहले दिए यस्ता सुझाव

होटल संघ नेपालका अध्यक्ष विनायक साहले सात प्रदेशमा कम्तीमा एक–एक मेगा प्रोजेक्ट लगानी सम्मेलनमा सरकारले देखाउन सक्नुपर्ने बताएका छन् । सरकारले आगामी वैशाख १६ र १७ गते गर्न लागेको लगानी सम्मेलनअघि सात प्रदेशमा कम्तीमा एक–एक मेगा प्रोजेक्ट फाइनल गर्नुपर्ने सुझाव दिए ।

अध्यक्ष साहले कुराकानीका क्रममा लगानी सम्मेलनमा सरकारले विदेशी लगानी आकर्षण गर्नको लागि ठूला मेगा परियोजनाहरू देखाउन आवश्यक रहेको बताए । उनले मुलुकको पर्यटकीय सम्भावनाको विषयमा प्रचार गर्न आवश्यक रहेको भन्दै त्यसले ठूलो प्रतिफल आउन सक्ने सुझाव राखे । 

अध्यक्ष साहले लगानी सम्मेलनमा सरकारले पर्यटन,आइटी र जलविद्युतलाई प्रमुख प्राथमिकतामा राखेकाले विदेशी र स्वदेशी लगानीकर्ता दुवैलाई प्राथमिकता दिन आवश्यक रहेको बताए । उनले स्वदेशी र विदेशी लगानी संरक्षण गर्नको लागि सरकारले विद्यमान नीति नियम र ऐनहरू परिमार्जन तथा संशोधन गर्न सुझाव दिए । 

उनले  नेपालका होटलहरु उद्योगको वर्गीकरणमा नपर्ने गरेको भन्दै औद्योगिक व्यवसाय ऐन संशोधन आगामी लगानी सम्मेलन भन्दा अघि गर्नु पर्ने बताए । उनले विगतमा भएका लगानी सम्मेलनमा के कस्ता कामहरू भए समीक्षा गर्न आवश्यक रहेको बताए । उनले लगानी सम्मेलनमा भएका प्रतिबद्धता सम्मेलनपछि कति कार्यान्वयन भए/नभएको अनुगमन गर्न आवश्यक देखिएको बताए । 

उनले विदेशी चेन होटेल र स्वदेशी लगानीमा सञ्चालन भएका होटेललाई समान रूपमा हेर्नु आवश्यक रहेको बताए । उनले लगानी सम्मेलनको विषयमा सरकारले पर्यटन व्यवसायीहरूसँग छलफल गर्न आवश्यक रहेको बताउन बताए । 

यस्तो छ अध्यक्ष साहले दिएको सुझाव 



तेस्रो लगानी सम्मेलनमा सरकारले पर्यटन,आइटी र जलविद्युतलाई प्रमुख प्राथमिकतामा राखेको छ । नेपालका पर्यटकको व्यापक सम्भावना छ । तर सम्भावना हुँदाहुँदै पनि त्यसबाट प्रतिफल पाउन नसकेको अवस्थामा नेपालले कति पर्यटकलाई सेवा दिन सक्छ । होटेल क्षेत्रको आवश्यक विकास गरिसकेका छौँ । लगानी सम्मेलनमा विदेशी र स्वदेशी लगानीकर्ता दुवैलाई प्राथमिकता दिनुपर्छ ।

स्वदेशी र विदेशी लगानी संरक्षण गर्नको लागि सरकारले विद्यमान नीति नियम र ऐनहरू परिमार्जन तथा संशोधन हुनुपर्छ । नेपालका होटलहरु उद्योगको वर्गीकरणमा पर्दैनौं । उद्योगमा दर्ता गरेर लगानी गरे पनि सरकारी सेवा सुविधाहरू हेर्दा सेवा क्षेत्रको मात्रै पाइन्छ । औद्योगिक व्यवसाय ऐन संशोधन आगामी लगानी सम्मेलन भन्दा अघि गर्नुपर्छ ।



विगतमा भएका लगानी सम्मेलनमा के कस्ता कामहरू भए समीक्षा गर्न आवश्यक छ । लगानी सम्मेलनमा भएका प्रतिबद्धता सम्मेलनपछि कति भए भएन भन्ने अनुगमन गर्न आवश्यक छ । त्यो भएको छ वा छैन समीक्षा गर्नुपर्छ ।

विदेशी चेन होटेल र स्वदेशी लगानीमा सञ्चालन भएका होटेललाई समान रूपमा हेर्नु आवश्यक छ । लगानी सम्मेलनको विषयमा सरकारले पर्यटन व्यवसायीहरूसँग छलफल गर्नु आवश्यक छ । ठूला छाता संगठनहरुसँग मात्रै छलफल गरेको देखिन्छ । लगानी सम्मेलनको विषयमा प्रत्यक्ष रूपमा छलफलमा सहभागिता गराउनु पर्छ ।

सरकारले लगानी सम्मेलनमा विदेशी लगानी आकर्षण गर्नको लागि ठूला मेगा परियोजनाहरू देखाउन सक्नुपर्छ । सात प्रदेशमा एक–एक वटा मेगा परियोजनामा लगानी आउने गरी सरकारले तयारी गर्नुपर्छ । मुलुकको पर्यटकीय सम्भावनाको विषयमा प्रचार गर्नसके अझ ठूलो प्रतिफल आउन सक्नेछ । 

  • प्रकाशित मिति : चैत ३, २०८० शनिबार ११:४६:५६

फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।



यस विषयसँग सम्बन्धित समाचार

यो सामग्री सेयर गर्नुहोस्

यो सामग्री सेयर गर्नुहोस्

यो पनि नछुटाउनुहोस्
मल्टिमिडिया