logo-img

१० महिनामा बागमती सरकारद्वारा ३८.९२ प्रतिशत मात्र बजेट खर्च

बागमती प्रदेश सरकारले चालू आर्थिक वर्ष २०८०/८१ को हालसम्म कूल विनियोजित बजेटको ३८ दशमलव ९२ प्रतिशत बजेट मात्र खर्च गरेको छ । चालू आर्थिक वर्षको १० महिना सकिनै लाग्दा प्रदेश सरकारका मन्त्रालयको बजेट खर्च न्यून देखिएको हो ।

प्रदेश कोष तथा लेखा नियन्त्रक कार्यालय हेटौंडा मकवानपुरका अनुसार प्रदेश सरकारको विभिन्न मन्त्रालयले चालू आर्थिक वर्ष २०८०/८१ को साउनदेखि हालसम्म कूल विनियोजित बजेटको ३८ दशमलव ९२ प्रतिशत अर्थात् २४ अर्ब ४० करोड ७८ लाख मात्र खर्च गरेको छ । 

सो अवधिमा प्रदेश सरकारको मन्त्रालयले चालूतर्फ ११ अर्ब ४१ करोड ५२ लाख तथा पुँजीगततर्फ १२ अर्ब ९९ करोड २५ लाख बजेट खर्च गरेको प्रदेश कोष तथा लेखा नियन्त्रक कार्यालयका प्रमुख लेखा नियन्त्रक हरिप्रसाद उपाध्यायले जानकारी दिए ।  

उनका अनुसार सबैभन्दा बढी प्रदेश सरकारको भौतिक पूर्वाधार विकास मन्त्रालयले ८ अर्ब ६९ करोड ८९ लाख बजेट खर्च गरेको छ । यस्तै, खानेपानी, ऊर्जा तथा सिँचाइ मन्त्रालयले २ अर्ब ८६ करोड, स्वास्थ्य मन्त्रालयले १ अर्ब ८६ करोड, सामाजिक विकास मन्त्रालयले १ अर्ब ६९ करोड, वन तथा वातावरण मन्त्रालयले १ अर्ब २३ करोड २९ लाख, कृषि तथा पशुपक्षी मन्त्रालयले ८१ करोड ९ लाख, पर्यटन, उद्योग तथा सहकारी मन्त्रालयले ६३ करोड ३६ लाख, आन्तरिक मामिला तथा कानुन मन्त्रालयले ९ करोड ६५ लाख, मुख्यमन्त्री तथा मन्त्रिपरिषद्को कार्यालयले १७ करोड ४८ लाख र आर्थिक मामिला तथा योजना मन्त्रालयले ९ करोड ५४ लाख खर्च गरेको प्रमुख लेखा नियन्त्रक उपाध्यायले बताए ।

त्यस्तै, प्रदेशसभा सचिवालयले १४ करोड ५६ लाख बजेट खर्चको प्रदेश कोष तथा लेखा नियन्त्रक कार्यालयले जनाएको छ । प्रदेश सरकारले चालू आर्थिक वर्षका लागि चालूतर्फ २६ अर्ब ४२ करोड १२ लाख, पुँजीगततर्फ ३५ अर्ब ७८ करोड ७८ लाख र वित्तीय व्यवस्थापनतर्फ ५० करोड गरी ६२ अर्ब ७० करोड ९० लाख रुपैयाँ बजेट विनियोजन गरेको थियो । रासस 





  • प्रकाशित मिति : वैशाख २७, २०८१ बिहीबार १४:१३:२७

फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।



यस विषयसँग सम्बन्धित समाचार

यो सामग्री सेयर गर्नुहोस्

यो सामग्री सेयर गर्नुहोस्

यो पनि नछुटाउनुहोस्
मल्टिमिडिया