काठमाडौं– संस्कृति, पर्यटन तथा नागरिक उड्डयन मन्त्रालयसमेत हेर्दै आएका प्रधानमन्त्री केपी शर्मा ओलीले हिजो बिहान सोलुखुम्बुको लुक्ला विमानस्थलमा भएको समिट एयरको विमान दुर्घटनाका सम्बन्धमा छानबिन गर्न छानबिन समिति गठन गरेका छन् ।

नागरिक उड्डयन प्राधिकरणका पूर्वमहानिर्देशक राजेशराज दलीको अध्यक्षतामा गठित समितिमा नेपाल वायुसेवा निगमका इन्जिनियर राजेश श्रेष्ठ र सीता एयरका पाइलट रवीन्द्र डंगोल सदस्य छन् भने पर्यटन मन्त्रालयका सहसचिव बुद्धिसागर घिमिरे सदस्यसचिव छन् ।

सोलुखुम्बुको लुक्ला विमानस्थलमा हिजो बिहान भएको जहाज दुर्घटनामा २ प्रहरीसहित ३ जनाको मृत्यु भएको थियो भने ४ जना घाइते भएका थिए ।

बिहान ९ बजेर २२ मिनेट जाँदा तेन्जिङ हिलारी विमानस्थल लुक्लाबाट ९–एन एएमएच कल साइनको समिट एयरको विमान रामेछापको लागि उड्ने क्रममा धावनमार्गबाट चिप्लिएर पार्किङ गरी राखिएको श्री एयर र मनाङ एयरका हेलिकोप्टरसँग ठोकिएको थियो ।