काठमाडौं– सोलुखुम्बुको लुक्ला विमानस्थलमा आइतबार बिहान भएकाे जहाज दुर्घटनाकाे अनुसन्धान गर्न संस्कृति, पर्यटन तथा नागरिक उड्डयन मन्त्रालयले नागरिक उड्डयन प्राधिकरण (क्यान) का पूर्वमहानिर्देशक राजेशराज दलीको अध्यक्षतामा छानबिन समिति गठन गरेकाे छ ।
छानबिन समितिमा नेपाल वायुसेवा निगमका इञ्जिनीयर राजेश श्रेष्ठ र सीता एयरका पाइलट रवीन्द्र डङ्गोल सदस्य र समिति सदस्य सचिवमा पर्यटन मन्त्रालयका सहसचिव बुद्धिसागर लामिछाने रहेकाे मन्त्रालयले जारी गरेकाे विज्ञप्तिमा लेखिएकाे छ ।
लुक्ला विमानस्थलमा आइतबार बिहान करिब साढे ९ बजे पर्यटक छाेडेर काठमाडाैं फर्किने क्रममा धावनमार्गमा चिप्लिएर समिट एयरको ‘नाइन एन एएमएच’ कलसाइन विमान राेकिराखेकाे मनाङ एयरसँग ठाेक्किएर दुर्घटना भएकाे थियाे ।
दुर्घटनामा समिट एयरका काेपाइलट सुदीप ढुंगाना, प्रहरी सहायक निरीक्षक रामबहादुर खड्का र रुद्रबहादुर श्रेष्ठकाे मृत्यु भएकाे थियाे ।
दुर्घटनाबाट घाइते भएका समिट एयरका पाइलट रवीन्द्र बहादुर रोकाया र हेलिकप्टरका पाइलट चेतबहादुर गुरुङ उपचारपछि घर फर्किएका छन् भने मनाङ एयरका लाक्पा शेर्पाको उपचार भइरहेको छ ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।