आइसिसी टी–२० विश्वकपका लागि हाल अमेरिकामा रहेको नेपाली क्रिकेट टिमले आज राति ह्युस्टन हरिकेन्ससँग दोस्रो अभ्यास म्याच खेल्दैछ । यी दुई टोलीबीचको खेल नेपाली समयअनुसार राति १ः४५ देखि ह्युस्टनस्थित प्रेरी भ्यू कम्पलेक्समा सुरु हुनेछ ।  

नेपाल पहिलो अभ्यास खेलमा ६ रनले विजयी भएको थियो । अन्तिम ६ बलमा हरिकेन्सलाई जित निकाल्न १० रन आवश्यक थियो । तर, तीव्र गतिका बलर करण केसीले २०औँ ओभरमा तीन रन मात्र खर्चेर एक विकेट लिएर नेपाललाई रोमाञ्चक जित दिलाए ।

नेपालविरुद्ध खेलिरहेको ह्युस्टनको टिममा पाकिस्तानबाट अन्तर्राष्ट्रिय क्रिकेट खेलेका उस्मान सिनवारी, नौमान अनवर र इमरान खान जूनियर पनि रहेका छन् । यस्तै, कोर्ने ड्राइ दक्षिण अफ्रिकाका लागि उमेर समूहको क्रिकेट खेलिसकेका खेलाडी हुन् ।

त्यस्तै, ह्युस्टनमा आबद्ध सुशान्त मोडानीले अमेरिकाका लागि ३१ ओडिआई र ५ टी–२० आई खेलेका छन् । 

त्यस्तै, नेपालविरुद्ध खेलिरहेको ह्युस्टनमा भारतीयमूलका स्मित पटेल र श्रीलंकाका लाहिरु मिलान्था छन् । नेपाल विश्वकप खेल्नुअघि अमेरिकाको स्थानीय क्लब ह्युस्टनसँग अभ्यास म्याच खेलिरहेको हो । 

आउँदो २ जुनदेखि सुरु हुने विश्वकपमा नेपालले ४ जुनमा नेदरल्याण्ड्स, १२ जुनमा श्रीलंका, १५ जुनमा दक्षिण अफ्रिका र १७ जुनमा बंगलादेशविरुद्ध खेल्ने तालिका छ ।

त्यसअघि नेपालले २७ मेमा क्यानडा र ३० मेमा अमेरिकासँग वार्मअप म्याच खेल्नेछ ।