मड्रिड– स्पेनिस क्लब बार्सिलोना इंग्लिस क्लब म्यानचेस्टर युनाइटेडलाई हराउँदै च्याम्पियन्स लिगको सेमिफाइनल प्रवेश गरेको छ ।

आज राति भएको क्वार्टरफाइनलको दोस्रो लेगमा लियोनल मेसीको बार्सिलोनाले युनाइटेडलाई ३–० ले हरायो । पहिलो लेग १–० ले जितेको बार्सिलोना समग्रमा ४–० ले विजयी भयो ।

घरेलु मैदान नाउक्यापमा भएको खेलमा बार्सिलोनाका लियोनल मेसीले सुरुआती दुई गोल गरे । खेलको १६औँ मिनेटमा पहिलो गोल गरेका मेसीले त्यसको चार मिनेटपछि नै दोस्रो गोल गरे ।

सुरुका केही मिनेट खेलमा युनाइटेडको दबदबा देखिएको थियो । ४०औँ सेकेण्डमा युनाइटेडका मार्कोस रासफोर्डको प्रहार बारमा लागेर फर्कियो ।  

मेसीको गोलपछि भने युनाइटेड दबाबमा पर्यो र खेलमा बार्सिलोना हाबी भयो । ६१औँ मिनेटमा काउटिन्होले गोल थपे । 

९०औँ मिनेटमा युनाइटेडका एलेक्स सान्चेजले उत्कृष्ट हेड गरे पनि बार्सिलोनाका गोलकिपरले रोक्न भ्याए । खेल ३–० मा टुंगियो । 

उता, अर्काे खेलमा अयाक्सले युभेन्टसलाई हराएर सेमिफाइनल प्रवेश गरेको छ । सन् १९९७ पछि अयाक्सले पहिलोपटक च्याम्पियन्स लिगको सेमिफाइनलमा स्थान बनाएको छ ।

आज रातिकाे दाेस्राे लेगमा अयाक्सले युभेन्टसलाई २–१ गोल अन्तरले हरायो र समग्रमा ३–२ ले विजयी भयो ।

हारसँगै, यसै सिजन रियल मड्रिडबाट युभेन्टस गएका पाँचपटकका विजेता रोनाल्डो २०१० यता पहिलोपटक च्याम्पियन्स लिगको सेमिफाइनलमा नदेखिने भएका छन् ।