आयोजक अमेरिकाले नवौँ संस्करणको आइसिसी टी–२० विश्वकपमा विजयी सुरुवात गरेको छ । आज बिहान सम्पन्न खेलमा खराब सुरुवात गरेको अमेरिकाले उत्कृष्ट कमब्याक गर्दै ७ विकेटको फराकिलो जित निकाल्यो ।  

क्यानडाले दिएको १ सय ९५ रनको लक्ष्य अमेरिकाले १७.४ ओभरमा ३ विकेट गुमाएर पूरा गर्‍यो । उसका लागि क्यारेबियन मूलका आरोन जोन्सले आक्रामक ब्याटिङ गरे । ४० बलको सामना गरेका उनले अविजित ९४ रनको इनिङ खेले । त्यसक्रममा जोन्सले १० छक्का र ४ चौका हिर्काए । 

यस्तै, एन्ड्रिज गौसले ४६ बलमा सात चौका र तीन छक्कासहित ६५ रन बनाए । कप्तान मोनांक पटेलले १६ रनको योगदान दिए । क्यानडाका लागि निखिल दत्त, डेलिन हेलिगर र कलीम सानाले एक/एक विकेट लिए । 

त्यसअघि अमेरिकाको डालासस्थित ग्रान्ड प्रेरी स्टेडियममा जारी खेलमा टस हारेर ब्याटिङको निम्तो पाएको क्यानडाले निर्धारित २० ओभरमा ५ विकेट गुमाएर १९४ रन बनायो । उसका लागि पूर्वकप्तान नवनीत धालिवाल र मध्यक्रमका ब्याटर निकोलस किर्टनले अर्धशतकीय पारी खेले । 

धालिवालले ४४ बलमा ६ चौका र तीन छक्कासहित ६१ रनको पारी खेलेका हुन् । टी–२० आईमा धालिवालको यो सातौं अर्धशतक हो । यस्तै, किर्टनले ३१ बलमा तीन चौका र दुई छक्काहित ५१ रनको इनिङ खेले ।

टी–२० आईमा उनको यो पहिलो अर्धशतक हो । यस्तै, अविजित रहेका श्रेयस मोव्वाले १६ बलमा दुई छक्का र दुई चौकासहित अविजित ३२ रनको आक्रामक पारी खेले । त्यस्तै, आरोन जोनसनले २३ र दिलप्रीत बाजवाले ११ रन जोडे । 

अमेरिकाका लागि कोरी एण्डरसन, अलि खान र हरमीत सिंहले एकरएक विकेट लिए । जारी संस्करणको विश्वकपमा पहिलोपटक २० देशले प्रतिस्पर्धा गरिरहेका छन् । प्रतियोगितामा नेपालले पहिलो खेलमा मंगलबार नेदरल्याण्ड्ससँग खेल्नेछ । 

यस्तै, नेपालले १२ जुनमा श्रीलंका, १५ जुनमा दक्षिण अफ्रिका तथा १७ जुनमा बंगलादेशको सामना गर्नेछ । नेपाल १० वर्षपछि विश्वकप खेल्न लागेको हो ।