logo-img

रवि लामिछानेलाई प्रधानमन्त्री बनाउन सिके राउत तयार

जनमत पार्टीका अध्यक्ष चन्द्रकान्त (सिके) राउतले प्रत्यक्ष निर्वाचित कार्यकारी प्रधानमन्त्रीको व्यवस्थाका लागि सरकार नचाहने र साना दलले संसदबाट व्यवस्था बदल्न सम्भव नभएको उल्लेख गर्दै आन्दोलन नै गर्नुपर्ने बताएका छन् । उनले आन्दोलनको नेतृत्वको गर्न उपप्रधान एवं गृहमन्त्री रवि लामिछानेलाई आग्रह गर्दै प्रधानमन्त्री बनाउने आश्वासन दिए । 

बुधबार काठमाडौंमा नेपाल समाजवादी पार्टी(नेसपा)को स्थापना दिवस कार्यक्रममा अध्यक्ष राउतले साना दलको संसद्मा दुई तिहाइ नपुग्ने र ठूला दलले प्रणाली परिवर्तन गर्न नचाहने हुँदा प्रत्यक्ष कार्यकारी निर्वाचित प्रधानमन्त्रीको लागि सडकबाट संघर्ष गर्नुको विकल्प नभएको धारणा राखे । 

उनले आन्दोलनको नेतृत्व गर्न गृहमन्त्रीलाई आग्रह गर्दै भने, ‘प्रत्यक्ष निर्वाचित प्रधानमन्त्रीको एजेण्डामा हामीहरू सहमत नै छौँ । एक किसिमले यो नै निकास हो भनेर मान्छौ पनि तर, अगाडि जाने बाटो के छ ? यो कुरा सरकारले गर्दिन्छ त ? गर्दैन ।’ 

राउतले भारतमा जवाहरलाल नेहरूले प्रधानमन्त्री नहुँदासम्म आन्दोलन गर्ने अधिकार हुन्छ भनेर बोलेको तर, प्रधानमन्त्री भैसकेपछि हामी सत्तामा आइसक्यौं किन आन्दोलन गर्नुपर्‍यो भन्न थालेको उदाहरण दिँदै भने, ‘यो एजेण्डा माओवादीकै हो तर, सत्तामा पुगिसकेपछि माओवादीले आफैं प्रधानमन्त्री बनाउने ठाउँमा छौँ भन्नुहुन्छ, दुई चार जनालाई प्रधानमन्त्री बनाउने हाम्रो हातमा भएपछि जनताको हातमा अधिकार किन दिने ? जनताले भोली बालेन जस्तो मान्छेलाई ल्याइदियो भने हामीले के गर्ने भनेर उहाँहरू तयार हुनुहुन्न अहिले ।’ 

सरकारले प्रणाली परिवर्तन नगर्ने, संसदबाट साना दलले दुई तिहाइ पुर्‍याउन नसक्ने उल्लेख गर्दै राउतले भने,‘हामी जतिसुकै छट्पटाए पनि उसकै निर्वाचन आयोग छ । उसकै अख्तियार छ । उसकै संवैधानिक निकायहरू छ । सबैतिर सञ्जाल भएपछि उनीहरूकै निर्वाचन प्रणालीबाट संसद्मा दुई तिहाइ पुर्‍याउन सक्दैनौ । यदि कुनै पार्टीले दुई तिहाइ पुर्‍यायो भने पनि निर्वाचन आयोगमा उजुरी हालेपछि त्यो पार्टी फुट्छ । जनमत पार्टीले आयोगमा कारबाहीको पत्र दिँदा दुई महिनासम्म पत्र हेर्ने फुर्सद नभएको निर्वाचन आयोगले २४ घण्टाभित्र पार्टी फुटाइदियो । यो प्रणाली हुँदासम्म संसदबाट अगाडि जान सक्दैनौ ।’

सरकार र सदन परिवर्तनको मोर्चा बन्न नसक्ने बताएका राउतले नयाँ शक्तिहरू, नागरिक समाज मिलेर सडकबाटै प्रणाली परिवर्तनको तयारी गर्नुपर्ने बताए । ‘यसमा विचार मात्रै गरेर पुग्दैन । धेरै विचार भइसक्यो । अब कति विश्लेषण गर्नुहुन्छ ? अब सडकमा ओर्लिएर अगाडि बढौँ । मैले बिपी कोइराला पछिको नेताको रूपमा आन्दोलनलाई हाँक्न सक्ने नेता हुनुहुन्छ भनेर गृहमन्त्रीज्यूलाई पटक पटक भनेको छु । तपाईँ आन्दोलनको लागि तयार हुनुहोस् । प्रधानमन्त्री त त्यसै तपाई बन्नुहुन्छ । त्यो ठूलो कुरा होइन’, राउतले भने । 





  • प्रकाशित मिति : जेठ ३०, २०८१ बुधबार

फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।



यस विषयसँग सम्बन्धित समाचार

यो सामग्री सेयर गर्नुहोस्

यो सामग्री सेयर गर्नुहोस्

यो पनि नछुटाउनुहोस्
मल्टिमिडिया