logo-img

बाबुराम भट्टराईको गुनासो- देशको लागि राम्रै गर्दा पनि मलाई भारतीय दलालको ट्याग भिराइयो

पूर्वप्रधानमन्त्री एवं नेपाल समाजवादी पार्टीका अध्यक्ष डा. बाबुराम भट्टराईले आफूलाई भारतीय दलाल भन्ने गरेकोमा आपत्ति जनाएका छन् । सत्ताका लागि लम्पसार नपरेर अंग्रेजको पालादेखिका सन्धि, सम्झौता समयानुकूल बनाउन लागेकै कारण आफूलाई भारतीय दलालको ट्याग मिलेको भन्दै उनले गुनासो गरे ।

पार्टी स्थापना दिवसको अवसर पारेर बुधबार काठमाडौंमा आयोजित कार्यक्रममा उनले भारतसँगको समस्या समाधान गरौँ भनेर लागेको आफूलाई दलाल देख्ने तर, कुर्सीका लागि भारतसँग लम्पसार पर्नेहरूलाई राष्ट्रवादी देख्ने भएकै कारण देश बन्न नसकेको चर्चा गरे । देशको लागि राम्रै गर्दा पनि आफूलाई भारतीय दलालको ट्याग भिराइएको भन्दै उनले असन्तुष्टि जनाए । 

भारतसँग भएका असमान सन्धि सम्झौता पुनर्लेखनका लागि प्रबुद्ध व्यक्ति समूह (इपिजी) बनाएर समस्या समाधान गर्नुपर्छ भनेर आफूले सुरु गरेकाले भारतीय दलाल भन्ने गरेको आरोप लागेको भन्दै असन्तुष्टि जनाए ।

उनले भने, ‘भारतसँगको सन्धि, सम्झौताहरू जुन हुन्, प्रबुद्ध व्यक्ति समूहको आधारमा फेरि पुनर्लेखन गरौँ भन्ने त मैले नै सुरु गरेको हो । र, अहिले त्यो हरायो । उल्टो मलाई नै भारतीय दलाल भयो भन्न थाले,’ उनले भने, ‘जसले प्रबुद्ध समूह बनाएर भारतसँग कूटनीतिक वार्ता गरेर यो समस्या हल गरौँ र खुला सिमाना असमान सन्धि, सम्झौता अंग्रेजका पालादेखि भए त्यसलाई समयानुकूल बनाऔँ भन्ने चाहिँ दलाल, जसले आफ्नो कुर्सीको निम्ति यहाँ १२ हात उफ्रिन्छ, दिल्लीमा गएर लम्पसार पर्छ, ती चाहिँ राष्ट्रवादी भएपछि यो देश बन्छ ?’

पहिले आफूले राजतन्त्रको अन्त्य गर्ने सङ्कल्प लिएकाले बिपी कोइरालाको समर्थन गरेको तर उनले राजालाई मान्न थालेपछि उनको साथ छाडेको भट्टराईले उल्लेख गरे । 

यस्तै, उनले राजतन्त्र अन्त्य गर्न आफू कम्युनिस्ट पार्टीमा लागेको र त्यसको अन्त्य भएपछि छोडेको स्पष्ट पारे । तर, उनले सत्ता नपाएरै आफूले नयाँ शक्ति हुँदै वैकल्पिक निर्माण कुनै लहड र सत्ता नपाएको रिसमा नबनाएको चर्चा गरे ।  





  • प्रकाशित मिति : जेठ ३०, २०८१ बुधबार

फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।



यस विषयसँग सम्बन्धित समाचार

यो सामग्री सेयर गर्नुहोस्

यो सामग्री सेयर गर्नुहोस्

यो पनि नछुटाउनुहोस्
मल्टिमिडिया