कोपा अमेरिकाको तयारीमा रहेका अमेरिका र ब्राजिलले बराबरी खेलेका छन् । आज भएको मैत्रीपूर्ण अन्तर्राष्ट्रिय फुटबलमा दुवै टिमले १-१ गोलको बराबरी खेलेका हुन् । 

फ्लोरिडाको ओलान्डो स्टेडियममा भएको खेलमा पाहुना टोली ब्राजिलले १७ औं मिनेटमा अग्रता लिएको थियो । राफिनाको पासमा रोड्रिगोले गोल गर्दै टिमलाई सुरुआती अग्रता दिलाएका थिए । तर, २६ औं मिनेटमा मिडफिल्डर क्रिष्टियन पुलिसीको गोलमा अमेरिकाले बराबरी गरेको थियो । 

त्यसपछि दुवै टिमले गोल गर्न नसक्दा मैत्रीपूर्ण खेल बराबरीमै टुंगियो । कोपा अमेरिका २१ जुनदेखि सुरु हुँदै छ । समूह ‘ए’ मा रहेको अमेरिकाले २४ जुनमा बोलेभियासँग खेल्दै प्रतियोगिताको सुरुआत गर्दा समूह ‘डी’ मा रहेको ब्राजिलले पहिलो खेल २५ जुनमा कोस्टारिकासँग खेल्नेछ । 

डिफेन्डिङ च्याम्पियन अर्जेन्टिनाले पहिलो खेल २१ जुनमा खेल्ने तालिका छ । उसले सन् २०२१ को फाइनलमा ब्राजिललाई हराउँदै कोपाको उपाधि जितेको थियो ।