logo-img

क्यान अध्यक्ष चतुरको चतुर्‍याइँ : कोटामा आफू गए, क्यानको खर्चमा भाडामा डाक्टर राखे
फाइल तस्बिर

आर्थिक पारदर्शिता नभएको भन्दै विवादले घेरिएको नेपाल क्रिकेट संघ (क्यान)मा अध्यक्ष चतुरबहादुर चन्दको अर्को ‘बदमासी’ बाहिरिएको छ । अन्तर्राष्ट्रिय क्रिकेट परिषद् (आइसिसी)ले तोकेको २५ सदस्यीय कोटामा सेक्युरिटी म्यानेजर र अफिसियल डाक्टर नराखी आफू अमेरिका उडेका अध्यक्ष चन्दले सामाजिक सञ्जालमा चर्को आलोचना भएपछि भाडामा डाक्टर राखेको पाइएको छ । त्यो पनि नेपाल क्रिकेट संघले नै पारिश्रमिक दिनेगरि । 

क्यान आफैँले खर्च व्यहोर्नेगरी नेपाली मूलका अमेरिकी डाक्टर होमनाथ पन्तलाई भाडामा लिएको तथ्य बाहिरिएको हो ।  क्यानका सचिव पारस खड्काले राष्ट्रिय खेलकुद परिषद् (राखेप)लाई जेठ २१ गते लेखेको जवाफी पत्रमा जारी विश्वकप क्रिकेट प्रतियोगिता अवधिभरका डाक्टर होमनाथ पन्तलाई टोलीमा समावेश गरेको बताएका छन् । 



आइसिसीको कोटामा आफू नबसी चन्दले त्यसमा टिम डाक्टर राख्न सक्थे । त्यसो हुँदा डाक्टरको हुन आउने खर्च आइसिसीले नै व्यहोथ्र्यो भने चन्दले आफ्नो खर्च व्यहोर्नुपथ्र्यो । तर, उनले त्यसो गरेनन् । बरु क्यानको खर्चमा डाक्टर टोलीमा समावेश गरे । आफू आइसिसीको कोटामा बसे । 

आइसिसीको टोलीमा अमेरिका उडेका नेपाली क्रिकेट इतिहासमै चन्द पहिलो अध्यक्ष हुन् । ‘आइसिसीबाट प्राप्त हुने २५ सदस्यीय सुविधाबाहेक सम्बन्धित संघहरूले आफ्नै स्रोतबाट खर्च बेहोर्नेगरि थप खेलाडी तथा अफिसियलहरू राष्ट्रिय टोलीमा समावेश गर्न पाउने प्रावधानअनुसार संघबाट खर्च बेहोर्नेगरि आइसिसीको स्वीकृतिमा टोलीमा समावेश गरिएको र विश्वकप क्रिकेट प्रतियोगिता अवधिभरका लागि एक जना स्थानीय अमेरिकन डाक्टर होमनाथ पन्तलाई समेत राष्ट्रिय क्रिकेट टोलीमा समावेश गरिएको ब्यहोरा अनुरोध छ,’ क्यानका सचिव पारस खड्काले राखेपलाई लेखेको पत्रमा उल्लेख छ । 

यसअघि सन् २००८ मा विश्व क्रिकेट लिग डिभिजन ५ खेल्न नेपाली टोली जर्सी जाँदा व्यवस्थापकका रुपमा गएका तत्कालीन महासचिव टंक पनेरु विवादमा परेका थिए । यस पटक अध्यक्ष चन्द आफैँले अमेरिका भ्रमण गर्ने निर्णय गरेका हुन्, त्यो पनि स–पत्नी ।

आइसिसीले दिएको अफिसियल टोलीमा चन्दबाहेक १५ जना खेलाडी, प्रशिक्षक मोन्टी देसाई, बलिङ प्रशिक्षकमा रोडेरिक ओर्भिल इस्टविक, रमन सिवाकोटी (एनालिस्ट), विक्रम न्यौपाने (फिजियो), अब्दुल सतार (ट्रेनर), वसन्त शाही (सहायक प्रशिक्षक), नन्दन हनमन्त फाडनिस (कन्सलटेन्ट प्रशिक्षक) अमेरिका गएका छन् । 



आइसिसीले संवादका लागि आवश्यक परेमा विभिन्न देशका मिडिया म्यानेजरलाई सम्पर्क गर्नु भनेर मिडिया नोट पठाए पनि क्यानले अझै मिडिया म्यानेजर उपलब्ध गराउन सकेको छैन । 

काठमाडौंको नागार्जुन नगरपालिकाका मेयर मोहनबहादुर बस्नेत पनि क्रिकेट हेर्ने बहानामा अमेरिका पुगेका छन् । उनले आफूलाई क्रिकेट प्रतियोगिता हेर्न भनेर क्यानले नै पत्र लेखेको भन्दै नगरपालिकामा बिदा स्वीकृत गराएका थिए ।



‘नागार्जुन नगरपालिकाका नगरप्रमुख मोहनबहादुर बस्नेतसमेत आफ्नै खर्चमा नेपालको खेल अवलोकनका लागि अमेरिका भ्रमणमा जानुभएको बुझिन आएको ब्यहोरा उल्लेख छ,’ सचिवले राखेपलाई पठाएको पत्रमा भनिएको छ । 

नगरप्रमुख बस्नेतले भ्रमणका लागि संघीय मामिला तथा सामान्य प्रशासन मन्त्रालयबाट स्वीकृतिसमेत लिएका छैनन् । अफिसियल भिजिटमा जाने हो भने मन्त्रालयको प्रस्तावमा मन्त्रिपरिषद्बाटै स्वीकृत हुनुपर्ने हुन्छ ।

क्यान, राखेप र खेलकुद मन्त्रालय छानबिनको घेरामा 

क्यानका एकपछि अर्को विवादित कदमहरू बाहिरिसँग राष्ट्रिय खेलकुद परिषद्, नेपाल क्रिकेट संघ र युवा तथा खेलकुद मन्त्रालय छानविनको घेरामा पर्ने पक्का छ । 

बुधबारको प्रतिनिधि सभा बैठकमा समेत सांसद भीम आचार्यले क्रिकेट विश्वकप हेर्ने बहानामा प्रधानमन्त्री कार्यालयबाटै पत्र कटाउने काम भएको र यो क्यानको नेतृत्वको संलगनताविना सम्भव नभएको भन्दै छानबिन गर्न माग गरेका थिए । 

खेलकुद मन्त्रालयसमेत आवश्यक अनुसन्धान गर्न तयारी गरिरहेको विशेष स्रोतले जनाएको छ ।  

  • प्रकाशित मिति : जेठ ३१, २०८१ बिहीबार

फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।



यस विषयसँग सम्बन्धित समाचार

यो सामग्री सेयर गर्नुहोस्

यो सामग्री सेयर गर्नुहोस्

यो पनि नछुटाउनुहोस्
मल्टिमिडिया