युइएफए युरो कप २०२४ मा युक्रेनले पहिलो जित निकालेको छ । पहिलो जित दर्ता गर्नेक्रममा युक्रेनले शुक्रबार बेलुका भएको खेलमा स्लोभाकियाविरुद्ध २–१ को पुनरागमन जित निकाल्यो ।

युक्रेनको जितमा माइकोला शापारेन्को र रोमन यारेमचुकले एक–एक गोल गरे । जर्मनीको मर्कुर स्पील एरेनामा भएको खेलमा सुरुवाती अग्रता स्लोभाकियाले लिएको थियो ।

उसका लागि इभान श्रान्जले १७औँ मिनेटमा गोल गरे । तर, स्लोभाकियाले अग्रता जोगाउन सकेन । ​५४औँ मिनेटमा माइकोला शापारेन्कोले गोल गर्दै खेललाई १–१ को बराबरीमा ल्याए ।

त्यसपछि ८०औँ मिनेटमा रोमन यारेमचुकले गोल गर्दै युक्रेनलाई २–१ को रोमाञ्चक जित दिलाए । यो जितपछि युक्रेन तीन अंकसहित समूह ‘इ’ को दोस्रो स्थानमा उक्लिएको छ ।

ऊ पहिलो खेलमा रोमानियासँग पराजित भएको थियो । पराजित स्लोभाकिया तीन अंकसहित तेस्रो स्थानमा छ । उसले पहिलो खेलमा उपाधि दाबेदार बेल्जियमलाई १–० ले स्तब्ध पारेको थियो ।