कोपा अमेरिका फुटबलअन्तर्गत अर्जेन्टिना र कोलोम्बियाबीचको फाइनल खेल निर्धारित समयको १ घण्टा २३ मिनेटपछि सुरु भएको छ ।

समर्थकले सुरक्षा नियम उल्लंघन गरेका कारण फाइनल खेल ढिला सुरु भएको हो । खासमा अर्जेन्टिना र कोलोम्बियाबीचको खेल नेपाली समयअनुसार बिहान ५ः४५ मा सुरु हुनुपर्ने हो । तर, फ्यानहरूले हार्ड रक स्टेडियमको गेटमा क्षति पुर्याएपछि खेल ७ः०८ मा सुरु भएको हो । 

ईएसपीएनका अनुसार केही उग्र समर्थकले स्टेडियमको गेटमा क्षति पुर्याएका थिए । टिकटबिना स्टेडियममा जबर्जस्ती प्रवेश गर्न खोज्दा यस्तो घटना भएको बताइएको छ ।

अर्जेन्टिनाले सेमिफाइनलमा क्यानडालाई २–० तथा कोलोम्बियाले उरुग्वेलाई १–० ले हराउँदै फाइनलको टिकट पक्का गरेका थिए । अब यी दुई टिम फाइनल पनि जित्दै कोपा ट्रफी चुम्न चाहन्छन् ।  

हालसम्म अर्जेन्टिनाले २९ पटक कोपा फाइनलमा स्थान बनाउँदा १५ पटक उपाधि जितेको छ । उसले गत संस्करणमा ब्राजिललाई १–० ले हराउँदै सर्वाधिक कोपा उपाधि जित्ने मामलामा उरुग्वेको रेकर्ड बराबर गरेको थियो ।

यसपालि अर्जेन्टिना उरुग्वेलाई पछि पार्दै १६औँ पटक उपाधि जित्ने लक्ष्यमा छ । यस्तै, २३ वर्षपछि कोपा फाइनल खेलिरहेका कोलोम्बिया पनि उच्च लयमा छ । उसले पछिल्लो २८ खेलयता हारको सामना गरेको छैन । सन् २००१ को कोपा च्याम्पियन कोलोम्बिया यसपटक अर्जेन्टिनालाई पनि हराएर वर्षौँदेखिको उपाधि खडेरी तोड्ने अभियानमा छ ।

हालसम्म अर्जेन्टिना र कोलोम्बियाले ४३ अन्तर्राष्ट्रिय खेलमा एकअर्काको सामना गरेका छन्, जसमा अर्जेन्टिनाले २६ खेल जितेको छ । यस्तै, कोलोम्बियासँग अर्जेन्टिना ९ खेलमा पराजित भएको विगत छ । यी दुई टिमले ८ खेल भने ड्र खेलेका छन् ।