कोपा अमेरिका फुटबलको फाइनलमा कोलम्बियाविरुद्ध अर्जेन्टिनाले अग्रता लिएको छ । खेलको ११२औँ मिनेटमा लाउटारो मार्टिनेजको गोलमा अर्जेन्टिनाले १–० को अग्रता लिएको हो ।  

त्यसअघि निर्धारित समयमा कुनै पनि टिमले गोल गर्न सकेका थिएनन् । फाइनलमा अर्जेन्टिनी कप्तान लिओनल मेस्सी ६६औँ मिनेटमा मैदान बाहिरिएका थिए । मैदानमा लडेपछि उनी खेल्न असमर्थ भएका थिए । 

जारी कोपामा सेमिफाइनलमा अर्जेन्टिनाले क्यानडालाई २–० तथा कोलोम्बियाले उरुग्वेलाई १–० ले हराउँदै फाइनलको यात्रा गरेका थिए । अब यी दुई टिम फाइनल पनि जित्दै कोपा ट्रफी चुम्न चाहन्छन् ।  

हालसम्म अर्जेन्टिनाले २९ पटक कोपा फाइनलमा स्थान बनाउँदा १५ पटक उपाधि जितेको छ । उसले गत संस्करणमा ब्राजिललाई १–० ले हराउँदै सर्वाधिक कोपा उपाधि जित्ने मामलामा उरुग्वेको रेकर्ड बराबर गरेको थियो ।

यसपालि अर्जेन्टिना उरुग्वेलाई पछि पार्दै १६औँ पटक उपाधि जित्ने लक्ष्यमा छ । यस्तै, २३ वर्षपछि कोपा फाइनल खेलिरहेका कोलोम्बिया पनि उच्च लयमा छ । उसले पछिल्लो २८ खेलयता हारको सामना गरेको छैन । 

सन् २००१ को कोपा च्याम्पियन कोलोम्बिया यसपटक अर्जेन्टिनालाई पनि हराएर वर्षौँदेखिको उपाधि खडेरी तोड्ने अभियानमा छ ।

हालसम्म अर्जेन्टिना र कोलोम्बियाले ४३ अन्तर्राष्ट्रिय खेलमा एकअर्काको सामना गरेका छन्, जसमा अर्जेन्टिनाले २६ खेल जितेको छ । यस्तै, कोलोम्बियासँग अर्जेन्टिना ९ खेलमा पराजित भएको विगत छ । यी दुई टिमले ८ खेल भने ड्र खेलेका छन् ।