म्यानचेस्टर सिटीले मैत्रीपूर्ण खेलमा चेल्सीविरुद्ध सहज जित निकालेको छ । आइतबार बिहान अमेरिकाको कोलम्बसमा सम्पन्न खेलमा चेल्सीविरुद्ध सिटीले ४–२ को जित निकालेको हो ।  

सिटीको जितमा एर्लिङ हालान्डले ह्याट्रिक र ओस्कार बबले एक गोल गरे । चेल्सीका लागि रहिम स्ट्रलिङ र नोनी मादुएकेले समान एक गोल फर्काए । 

चौथो मिनेटमा हालान्डले पेनाल्टीमार्फत गोल गर्दै सिटीलाई सुरुवाती अग्रता दिलाएका थिए । उनले त्यसको एक मिनेटपछि अर्को गोल गर्दै सिटीलाई २–० ले अघि बढाए । ५५औँ मिनेटमा ओस्कार बबले गाल गरेपछि सिटीले ३–० को अग्रता पायो ।

५६औँ मिनेटमा हालान्डले ह्याट्रिक पूरा गर्दा सिटी ४–० ले अघि बढ्यो । खेलको ५९औँ मिनेटमा रहिमले गोल गर्दा खेल ४–१ को स्थितिमा आयो । 

८९औं मिनेटमा नोनीले गोल गरे पनि चेल्सीले ४–२ अन्तरले हार बेहोर्‍यो । नयाँ सिजनअघिको मैत्रीपूर्ण खेलमा चेल्सीको यो दोस्रो हार हो । उसले यसअघि सेल्टिकसँग हार बेहोरेको थियो । 

यस्तै, चेल्सीले क्लब अमेरिकालाई हराउँदा रेक्समसँग भने बराबरी खेलेको थियो । त्यस्तै, सिटीको यो पहिलो जित हो । यसअघि ऊ सेल्टिक, एसी मिलान र बार्सिलोनासँग टाइब्रेकरमा पराजित भएको थियो ।