सेन्ट्रल एसियन भलिबल एसोसिएसन (काभा) महिला नेसन्स लिग भलिबल प्रतियोगितामा नेपालले पहिलो हार बेहोरेको छ । यसअघि श्रीलंका र भारतलाई पराजित गरेको नेपाल इरानसँग पराजित भएको हो । 

इरानले नेपाललाई ३–२ ले पराजित गरेको हो । त्रिपुरेश्वरस्थित राष्ट्रिय खेलकुद परिषद्को कभर्डहलमा भएको खेलमा इरानविरुद्धको खेलमा नेपाल पहिलो सेटमा इरानसँग १६–२५ ले पराजित भयो । उक्त सेटमा इरानले १६–१० को अग्रता बनाएपछि नेपाल खेलमा फर्कन सकेन । 

दोस्रो सेटमा भने नेपालले सुरुआतमा ७–० को अग्रता बनाएको थियो । सोही अग्रतालाई जोगाउँदै नेपालले इरानमाथि २५–१६ ले जितेपछि खेललाई एक–एकको बराबरीमा आयो । 

खेलको तेस्रो सेटको सुरुआतमा नेपालले ७–२ को अग्रता बनायो । इरानले ९–९ को बराबरीमा पुर्‍याएपछि यो सेट निकै प्रतिस्पर्धात्मक बनेको थियो । अन्त्यमा इरानले २५–२३ ले जित्यो । 

खेलको चौथो सेटमा नेपालले २५–१५ ले आफ्नो पक्षमा पार्दै खेललाई दुई–दुईको बराबरीमा ल्यायो । अन्तिम तथा निर्णायक पाँचौँ सेटमा भने नेपाल पराजित भयो । 

इरानले पाँचौँ सेट १५–१३ ले जित्यो । जितसँगै इरानले ४ खेलबाट सात अंक बनाएको छ भने नेपालको तीन खेलबाट छ अंक बनाउँदै सेमिफाइनलमा पुगिसकेको छ । 

नेपालसँगै इरान, भारत र श्रीलंका पनि सेमिफाइनलमा पुगेका छन् ।