काठमाडौंमा जारी​ काभा वुमन्स नेसन्स भलिबलको उपाधिका लागि आज नेपालले भारतको सामना गर्दैछ । नेपाल र भारतको फाइनल भिडन्त दशरथ रंगशालाको कभर्डहलमा बुधबार साँझ ५ बजेदेखि सुरु हुनेछ ।

घरेलु टोली नेपालले सेमिफाइनलमा इरानलाई ३–० को सोझो सेटमा हराउँदै फाइनलमा भारतसँगको भिडन्त पक्का गरेको हो । लिग चरणमा भएको इरानसँगको पराजयको बदला नेपालले सेमिफाइनलमा लियो । लिग चरणमा इरानसँग नेपाल ३–२ को सेटले पराजित भएको थियो । 

यस्तै, लिग चरणमा नेपाल र भारतको खेल निकै प्रतिस्पर्धात्मक बनेको थियो । उक्त खेलको पहिलो सेट नेपालले २५–१८ ले जित्यो । खेलको दोस्रो सेट भारतले २५–१२ ले आफ्नो पक्षमा पार्दा तेस्रो सेटमा नेपालले भारतलाई २५–१७ ले पाखा लगायो ।

चौथो सेट १८–२५ ले गुमाएको नेपालले अन्तिम तथा निर्णायक पाँचौँ सेटमा भारतलाई १५–१३ ले हराउँदै ऐतिहासिक जित निकाल्यो । लिग चरणमा भारतविरुद्ध ऐतिहासिक जित निकालेको नेपाल उपाधि उचाल्ने लक्ष्यका साथ आज मैदान उत्रनेछ । भारतीय टोली लिग चरणको हारको बदला लिँदै नेपाललाई हराएर लगातार दोस्रोपटक उपाधि जित्ने लक्ष्यमा छ ।

विगत तीन संस्करणमा यो प्रतियोगिता ‘काभा महिला भलिबल च्यालेञ्ज कप’को नामबाट आयोजना गरिएको थियो । काभामा हालसम्म नेपाली महिला टिमले सर्वाधिक दुईपटक उपाधि जितेको छ । 

सन् २०१९ मा बंगलादेशमा भएको पहिलो संस्करण राउन्ड रोबिनमा खेलाइएको थियो । उक्त संस्करणमा नेपाल तालिकाको शीर्षमा रहँदै च्याम्पियन बन्यो । उक्त सिजनमा भारतले भने सहभागिता जनाएको थिएन । 

यस्तै, सन् २०२१ मा भएको दोस्रो संस्करणमा पनि नेपाल च्याम्पियन बन्यो । उक्त सिजनको फाइनलमा उज्बेकिस्तानलाई ३–२ सेटले हराउँदै नेपाल च्याम्पियन बनेको हो । 

भारतले भने सो संस्करणमा पनि भाग लिएन । उसले सन् २०२३ को काभामा भने सहभागिता जनायो । भारतले फाइनलमा काजकिस्तानलाई ३–० को सोझो सेटमा हराउँदै उपाधि पनि जित्यो । उक्त संस्करणमा नेपाल भने तेस्रो भयो । 

यसपालि नेपाल सो प्रतियोगिताको नतिजामा सुधार गर्दै डिफेन्डिङ च्याम्पियन भारतलाई हराएर तेस्रोपटक उपाधि जित्न चाहन्छ । यदि आज भारतलाई हराउन सके नेपालले अर्को इतिहास रच्नेछ । हालसम्म भलिबलमा भारतलाई हराएर उपाधि जित्न सकेको छैन ।