काठमाडौं– राष्ट्रिय जनता पार्टी ‘राजपा’ नेपालले उपेन्द्र यादव नेतृत्वको संघीय समाजवादी फोरमभन्दा डा.बाबुराम भट्टराई नेतृत्वको नयाँ शक्ति पार्टी, नेपालसँग पार्टी एकता गर्न सकारात्म भएको छ । राजपाको आज बसेको पदाधिकारी समितिको बैठकमा नयाँ शक्तिसँग पार्टी एकता गर्न इच्छुक भएको हो ।
राजपा पार्टी अध्यक्ष मण्डलका सदस्य राजेन्द्र महतोले फोरम नेपालसँग एकीकरणको विषयमा चिठी अदान प्रदान मात्र भएको र त्यसबाहेक अरु केही नभएको धारणा राखे ।
फोरम नेपालसँगै नयाँ शक्तिसँग एकीकरणका लागि अनौपचारिक छलफल भने भएको उनले बैठकलाई जानकारी गराए ।
बैठकमा पार्टीको महाधिवेशन, देशको समसामयिक राजनीतिक अवस्था, प्रदेश तथा स्थानीय सरकारको समीक्षा, पार्टी एकीकरणलगायतका विषयमा छलफल भएको थियो ।
यता नयाँ शक्ति पार्टीले भने वैकल्पिक शक्तिरूबीच ध्रुवीकरणका लागि छलफल, सहकार्य र एकताका लागि नयाँ शक्ति पार्टी सधैँ तयार रहेको बताएको छ ।
नयाँ शक्तिका सूचना तथा सञ्चार विभाग प्रमुख विश्वदिप पाण्डेले बजारमा चर्चा भएजस्तो एकताकै उचाइमा कतै पनि कुनै पनि पार्टीसँग छलफल नभएको बताए ।
विभिन्न विकल्पमा राजनीतिक छलफल र कुराकानी सबै वैकल्पिक शक्तिहरुबीच नयाँ शक्ति पार्टीले बेलाबेला गरिरहेको उनको भनाई छ ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
