युक्रेनले आफ्नो फौजले रुसको १ हजार वर्ग किलोमिटर भूभाग नियन्त्रणमा लिएको दाबी गरेको छ । युक्रेनी सेनाका कमान्डर ओलेक्जान्डर सीर्स्कीले युक्रेनले कुर्स्क क्षेत्रमा आफ्नो कारबाही जारी रहेको बताएका छन् । 

युक्रेनी राष्ट्रपति भोलोदिमिर जेलेन्स्कीले अरू देशमा युद्ध निम्त्याएको रुसभित्रै युद्ध पुगेको बताएका छन् । रुसका राष्ट्रपति भ्लादिमिर पुटिनले भने आफ्नो देशको इलाकाभित्र प्रवेश गरेको बदलामा युक्रेनलाई ‘समुचित जवाफ दिने’ चेतावनी दिएका छन् । 

युक्रेनको आक्रामक कदमपछि पुटिनले क्षेत्रीय गभर्नर र सुरक्षा अधिकारीहरूसँग महत्त्वपूर्ण बैठक गरेका छन् ।  

युक्रेनी फौज गत मंगलबार प्रवेश गरेको रुसको कुर्स्क क्षेत्रका गभर्नरले युक्रेनी फौजले २८ वटा गाउँ नियन्त्रणमा लिएको बैठकमा बताएका छन् । 

गभर्नर एलेक्सी स्मिरनोफले बैठकमा युक्रेनी फौज आफ्नो क्षेत्रको १२ किलोमिटरभित्र रहेको जानकारी दिए ।