प्रधानमन्त्री एवं नेकपा एमालेका अध्यक्ष केपी शर्मा ओलीले गैरसहकारी तत्वहरू बेग्लै उद्देश्यले सहकारीमा प्रवेश गरेका कारण केही सहकारीमा समस्या उत्पन्न भएको बताएका छन् ।

बुधबार राजधानीमा आयोजित स्टार्टअप नेसनलाई सम्बोधन गर्दै प्रधानमन्त्री ओलीले सहकारी सञ्चालन गर्न नजानेर नभइ गैरसहकारी तत्वहरू सहकारीमा घुसेका कारण सहकारीप्रतिको निष्ठा नरहेको बताएका हुन् । 

वर्तमान सरकार सहकारीमा देखिएका सबै समस्याको समाधान गरेर अगाडि बढ्ने प्रधानमन्त्री ओलीको दाबी छ । 

‘सहकारी अचानक ठूला भए । सहकारीका मूल्य मान्यताअनुसार चलेनन् । सम्पूर्ण सहकारी बचतकर्ताको विश्वास कम गर्ने प्रवृत्ति हावी भयो । हुन त हजारौं सहकारीमध्ये केहीमा समस्या भएको हो । गैरसहकारी तत्वहरू सहकारीमा घुसे । सहकारीहरू गर्दागर्दै नजानेर होइन कि गैरसहकारी तत्वहरू बेग्लै उद्देश्यले प्रवेश गरे । त्यसले सहकारी प्रतिको निष्ठा रहेन । सहकारीमा बेइमानी गर्ने नियतले केही मान्छेहरू प्रवेश गरे । अब सबै सहकारीहरूमा देखिएका समस्याहरू समाधान गरेर अगाडि बढ्छौँ । अगाडि बढाउनुपर्छ,’ उनले भने ।  

हजारौंमध्ये केही मात्र सहकारीमा समस्या देखिएको उल्लेख गर्दै प्रधानमन्त्री ओलीले देशभर सहकारीको सञ्जाल विस्तार गरेर लैजानुपर्ने उनको भनाइ छ । 

त्यस्तै, उनले उद्योग, कृषिको आधुनिकरणसँग सम्बन्धित साना उद्योगको स्थापनासँगै सेवा क्षेत्रमा नवीन सोचका साथ अगाडि बढ्न अनुकूल वातावरण बनेको बताए । 

‘विभिन्न क्षेत्रमा स्टार्टअप अगाडि बढाएर लैजानुपर्छ । उद्योग, कृषिको आधुनिकरणसँग सम्बन्धित साना उद्योगहरूको स्थापना र अन्य क्षेत्रहरूबाट काम अगाडि बढाउने र सेवा क्षेत्रलाई गति दिनका लागि नवीन सोचका साथ नयाँ भावनाका साथ अगाडि बढ्न आवश्यक रहेको छ । स्टार्टअपका लागि अनुकूल वातावरण बनेको छ,’ प्रधानमन्त्री ओलीले भने ।