उद्योग, वाणिज्य तथा आपूर्तिमन्त्री दामोदर भण्डारीले चाडपर्व र  अन्य  समयमा खाद्यान्नको अभाव नहुने बताएका छन् ।  

शुक्रबार उद्योग तथा वाणिज्य र श्रम तथा उपभोक्ता हित समितिको बैठकमा बोल्दै उनले नयाँ करका दरहरू हेरफेर हुँदा बजारमा मूल्यको प्रभाव परे पनि खाद्यान्न वस्तुको अभाव नहुने बताएका हुन् ।

उनले भने, ‘चाडपर्वलाई विशेष लक्षित गरेर अहिलेको अत्यावश्यक र दैनिक खाद्य तथा उपभोग्य वस्तुको अभाव हुने छैन् । मूल्य शृंखला यतिखेर जुन स्तरमा छ । खासगरी चालू आर्थिक वर्षको बजेटको आसपासमा छ । बजेट आइसकेपछि बजेटका दरमा कर सरकारले निर्धारण गर्छ । कर निर्धारण भइसकेपछि त्यसको केही असर बजारमा जान्छ नै । त्यसले गर्दा थोरै मूल्य त्यसको दबाबमा पर्नु स्वाभाविक हो ।’

साथै उनले खुला सीमाका कारण नेपाली बजारमा प्रभाव परिरहेको बताए । उनले खुला सीमामा निगरानी, अनुगमन र प्रणालीमा सुधार गर्नुपर्ने बताए ।